Возлю́блене, а́ще сотвори́ши нача́ла до́бра, подвиза́йся я́ко да соверши́ши и ста́рость свою́ де́тельми до́брыми, и бу́деши я́ко свети́льник просвеща́я мно́ги на путь Госпо́день. А́ще ли из чре́ва стропо́тлив изы́деши, в безче́стии есть ста́рость твоя́. Положи́ у́бо основа́ние кре́пко, да взы́дет де́ло твое́ на высоту́. Пе́рвое же бра́те, Бога бо́йся и Того́ сла́ви всем се́рдцем твои́м, я́ко да и Сам тя просла́вит со святы́ми свои́ми. От ю́ности восприими́ кро́тостную прему́дрость, не оставля́й ея́ до после́дняго издыха́ния: та бо тя наста́вит на стези́ пра́ведныя. И быв сосу́д избра́н, и́маши похвалу́ от Бо́га, и челове́цы возвели́чат тя. А́ще же пре́дан бу́деши в ру́це бра́ту, предстоя́щым на послуже́ние бра́тии да ти ся не прилучи́т глаго́лати в по́мысле твое́м: я́ко аз вели́к есмь и све́тел роди́телю сын, сей же не дости́жен и проси́телю сын нари́чется. А́ще ли и от рабо́ты есть, и ка́ко могу́ аз покори́тися ему́, уко́р бо ми есть а́ще се сотворю́ - не помышля́й сих, бра́те. Не бо му́дростию помышля́еши сего́, совлеки́йся ве́тхаго челове́ка тли́маго по́мысл сей, по преле́стней по́хоти твори́т се. Мы же, возлю́блене, я́ко от Бо́га пре́дани духо́вней бра́тии на рабо́ту, да терпи́м рабо́тающе, да ся сподо́бим свобо́де пра́ведных, по́мняще всех Влады́ку, И́же убожа́ нас ра́ди, бога́т Сый, да и мы того́ убо́жеством обогати́мся, Ему́же сла́ва во ве́ки веко́в. Ами́нь.