Бра́те, а́ще отве́ргся су́етнаго жития́ и вни́деши в о́бщее житие́, и пре́дан бу́деши игу́меном бра́ту ино́му учи́ти тебе́ страсте́м де́тельным, да ти ся не ключи́т глаго́лати проти́вных бо́льша себе́. Егда́ же помышля́еши си непобеди́мая, и рече́ши: «Аз у́бо оста́вих бога́тство, до́мы и виногра́ды и рабы́, сия́ вся вмени́х уме́ты, да Христа́ приобря́щу, сей же никому́ же сый господи́н, мно́жицею же по ну́жди прише́л есть, да сему́ ли ся хощу́ покори́ти?» Или «гла́дом мрох и приидо́х се́мо». Ника́коже сего́ помышля́й, возлю́блене, горды́ни бо словеса́ си́и суть испо́лнь. Но разуме́й, я́ко всех нас Влады́ка Христо́с нас ра́ди смири́ся Сам, послушли́в до сме́рти бысть, смерть же и распя́тие.
Разуме́й же и се, е́же ти глаго́лю, даст бо ти Госпо́дь ра́зум о всем: Два страда́льца приидо́ста подвиза́тися ку́пно, и еди́н совлече́ся оде́жды све́тлы, други́й же порт, ника́коже у́бо оде́жды све́тлы взе́млет страда́лец во вре́мя по́двига на по́мощь супроти́внаго, но па́че му́жество и худо́жество со благи́м подвиго́м.
Или́ ка́ко дерзне́м проси́ти от Бо́га на́шего оставле́ния пе́рвых грех на́ших, не забы́вше пе́рваго жития́? Или́ как облеце́мся но́вым челове́ком богосотворе́ным, а не совле́кшеся ве́тхаго челове́ка, тли́маго по́хоти ле́стныя? Невозмо́жно бо есть ве́тхаго совокупи́ти с но́вым, Спа́су на́шему ре́кшу: «Никто́же возложи́т пла́та искропле́на ве́тха на ри́зу но́ву». Ниже́ мудру́й на ве́тхаго человеќа, и́мже пи́сано есть: «Хотя́й в вас бы́ти прему́др, да бу́дет буй». Да есть прему́др. Прему́дрость бо ми́ра сего ‐ бу́есть от Бо́га есть. Приими́ у́бо смире́ную му́дрость. Высо́кая бо в челове́цех, ме́рзска суть пред Бо́гом. Я́ко да до́бре иску́сно вся испра́вив, и́маши име́ти похвалу́ от Бо́га и насле́диши вене́ц жи́зненый, и́же обеща́ Госпо́дь лю́бящым Его́.
Те́мже и от ме́ньшаго жития́ гряду́щым во мни́шеское житие́, не высокому́дрствовати, ни о сла́ве возноси́тися, но вся́ку кро́тость и смирен́ую му́дрость показа́ти, помы́шляюще благода́ти Госпо́дня. От коли́ка, ка́ла и ти́ны ве́ка сего́, извлече́ я́ Госпо́дь. Еда́ ка́ко, разсе́явшуся уму́ их, услы́шатся, я́ко неключи́ми от Соде́теля, рече́ным во псалме́: «Челове́к в че́сти сый не разуме́. Приложи́ся скоте́х несмы́сленых и уподо́бися им»?
Те́мже возлю́блене, рабо́таим Го́сподеви со смире́ною му́дростию вся дни живота́ на́шего, вознося́щу от земли́ убо́га, и от гно́ища устрабля́юща ни́ща, я́ко да по кончи́не сподо́бит ны сла́ве святы́х, кро́тких и смире́ных, и́мже пис́ана бы́ша: «Госпо́дь возда́ст и́злиха творя́щым горды́ню». И па́ки: «Госпо́дь го́рдым проти́вится, смире́ным же дае́т му́дрость и благода́ть». Тому́ слава во ве́ки. Ами́нь.