Бра́те, подвиза́йся я́ко до́брый во́ин Иису́с Христо́в, до́ндеже вре́мя и́маши. Се ве́дый я́ко не тле́ннаго ти венца́ де́ля предлежи́т се подвиза́ние, но на очище́ние грехо́в и на жизнь ве́чную. Сотвори́ у́бо смире́нно целому́дрие все́ми делесы́ свои́ми, е́же есть ма́ти послуша́нию, отве́рзи же от себе́ круподу́шие и облецы́ся ве́рою вся́чески, я́ко да ви́дев Госпо́дь твоея́ души́ единоду́шие, все́ми укрепи́т тя. Возненави́ди же зело́ ле́ность и ненавиде́ние, и всяк зол нрав и за́висть Го́спода ра́ди, я́коже еси́ оста́вил по пло́ти роди́теля своя́, дру́ги же и име́ния. А́ще бо в нача́ле посла́биши по́мыслу си, труд и́маши име́ти и тщету́. А́ще и приключи́тся нам когда́ потруди́тися ма́ло вы́ше ме́ры, тогда́ не поро́пщем Го́спода ра́ди. Ропща́й бо, исчезе́ние себе́ твори́т, я́ко не от своего́ предложе́ние де́лает. Ты же я́ко мудр сый, не возненави́ди слабе́йшая бра́тия, ни ревну́й в безстра́шии Бо́жии ходя́щым. Се ве́дый испы́тно, я́ко отпада́яй сам ся отмета́ет, и побежда́яй, венчева́емь быва́ет. И па́ки ты, не возненави́ди бра́та, еда́ ка́ко страсть обышла́ его́ есть, ея́же ты не ве́си, и сего́ ра́ди не́мощь прино́сит. Сего́ подоба́ет па́че поми́ловати и моли́тися зань, а не оскорби́ти его́ я́ко неми́лостиву су́щу. Ты же подвиза́йся до́бре, ве́дый к Кому́ изше́л еси́. Се бо предлежи́т ти вре́мя наро́чито, на собра́ние богатства неги́блемаго, служе́нием и плодоприноше́нием, е́же к бра́тии. Те́мже возлю́блене, а́ще потребля́еши гной из сре́дняго дворца́, потреби и вну́треняя мирски́я по́хоти. А́ще ли же помета́еши по́пел сей ка́льный, со мно́гим смире́нием, соверша́й де́ло, помина́й проро́ка глаго́люща: «Иде́же по́пел я́ко хлеб ядя́х, и питие́ мое́ с пла́чем растворя́х». Поразуме́й же возлю́блене сего́ тле́маго огня́, и воспомяни́ у́бо ве́чный пла́мень, хотя́щий поя́сти гре́шники. Пла́чися, зане́же согреши́л еси́. Ку́пно же и за мя гре́шнаго, я́ко да оставле́ние грехо́м да́рствует нам Госпо́дь, Ему́же сла́ва во ве́ки. Ами́нь.