Сей при Гала́тех и́же во Агки́ре воспита́н быв: до седми́ лет с роди́тельми пребы́в. Та́же писа́ния ра́ди во Иерусали́м отъи́де, и отту́ду во Антиохи́ю. И та́мо не́где гроб обре́т, вни́де вонь, ему́же и огра́ду иму́щу, в ню́же приима́ше приходя́щих. Двема́ же де́ньма ма́ло хле́ба вкуша́я, и во́ду в ме́ру. Исцели́ же моли́твою не́коего, и его́ сожи́тельника сотвори́. Но и ма́терь блаже́ннаго Феодори́та епи́скопа Ки́прскаго, благочести́ву су́щу и богоуго́дну, от ослепле́ния исцели́. И по́вара не́коего бесо́м стра́ждуща уврачева́. И друга́го неве́жу, от таковы́я стра́сти исцели́. И воево́ду гра́дскаго не́коей деви́цы понаси́лити хотя́ща ручны́м прещением (помава́нием) возбрани́, и ослепи ему о́чи. И па́ки ма́терь Феодори́тову боле́знующу, и стра́ждущу от сме́рти изба́вит. Шестьдеся́ть и два ле́та богоуго́дно пожи́в. И по сих с ми́ром дух свой Го́сподеви предаде́, и трудо́м воздая́ния восприи́м.