Стихи́:

Ты же, Три́фоне что? Мече́м умре́ти пости́г:

Вре́мя же что тебе́ кончи́на? Новоме́сячие:

Февра́лия в пе́рвый Три́фон пре́жде посече́ния у́мре.

Сей бя́ше от Лампса́ковы ве́си, Фриги́йския епа́рхии, в ца́рство Гордиа́ново, во второсо́тное де́вятдесять пя́тое ле́то от А́вгустова ца́рства. Еди́наче а́ще и юн сый во́зрастом, но по ино́му начина́нию пребыва́я: гу́си бо пася́ше, я́коже глаго́лют, и Ду́ха Свята́го испо́лнен быв. И бя́ше целя́ вся́кия боле́зни, и бе́сы прогоня́я. Уврачева́ же и царе́ву дщерь бе́сом одержи́му, его́же глаго́лют и показа́ти предстоя́ща во о́бразе я́ко пса че́рна, и лука́вая своя́ де́йствия пове́дающа: и мно́гия о чудеси́ ко Христо́ве ве́ре приведе́. В ца́рство же Де́киево, иже и Фили́ппа восприи́м держа́щаго с Гордиа́ном, обо́лган бысть Акили́ну епа́рху восто́чному, я́ко у́бо си́це ре́кшым: не слу́жит бого́м. Приведе́н же бысть к нему́ в Ники́ю, и испове́дав Христо́во и́мя. И пе́рвее ра́нен быв, та́же к коне́м ди́виим привя́зан, и мы́чен во вре́мя зи́мное сквозе́ злопроходи́мая ме́ста. Посе́м верху́ о́стрых желе́зных гво́здий наг влачи́мь бысть. Та́же биемь, и свеща́ми паля́щими ребра ему́ вже́гше, и ме́чное осужде́ние прии́м, и́же и предвари́в, дух Бо́гу предаде́. Соверша́ется же собо́р его́ во свое́м его́ муче́нии су́щем в честне́м апо́стольстве свята́го Иоа́нна Богосло́ва близ святы́я и вели́кия це́ркве.

Стихи́:

Во гро́бе живы́й Петр я́коже на возду́се,

Возду́шнаго жре́бия прия́т вме́сто гро́ба.

Сей при Гала́тех и́же во Агки́ре воспита́н быв: до седми́ лет с роди́тельми пребы́в. Та́же писа́ния ра́ди во Иерусали́м отъи́де, и отту́ду во Антиохи́ю. И та́мо не́где гроб обре́т, вни́де вонь, ему́же и огра́ду иму́щу, в ню́же приима́ше приходя́щих. Двема́ же де́ньма ма́ло хле́ба вкуша́я, и во́ду в ме́ру. Исцели́ же моли́твою не́коего, и его́ сожи́тельника сотвори́. Но и ма́терь блаже́ннаго Феодори́та епи́скопа Ки́прскаго, благочести́ву су́щу и богоуго́дно, от ослепле́ния исцели́. И по́вара не́коего бесо́м стра́ждуща уврачева́. И друга́го неве́жу, от таковы́я стра́сти исцели́. И воево́ду гра́дскаго не́коей деви́цы понаси́лити хотя́ща ручны́м прещением (помава́нием) возбрани́, и ослепи ему о́чи. И па́ки ма́терь Феодори́тову боле́знующу, и стра́ждущу от сме́рти изба́вит. Шестьдеся́ть и два ле́та богоуго́дно пожи́в. И по сих с ми́ром дух свой Го́сподеви предаде́, и трудо́м воздая́ния восприи́м.

Стихи́:

Вендимиа́н ‐ дре́во доброде́тели ве́лие,

Насажде́но в земли́ и во Град принесе́но.

Сей учени́к бысть свята́го Авксе́нтия молча́вшаго на горе́, и по сме́рти его́ в разсе́ль ка́менную вшед, и та́мо ма́лу хлеви́ну сотвори́, и ту поживе́ четы́редесять и два ле́та. И внегда́ хотя́ ко Го́споду отъити́, коле́на к земли́ приклони́в, дух Го́сподеви предаде́.

Ве́дуще бу́дите возлю́бленнии, я́ко в сий день предпра́зднство есть внесе́ния в це́рковь Го́спода на́шего Иису́са Христа́, е́же сотвори́ зако́н соверша́я, Сам Сый Законода́вец. И того́ ра́ди сие́ сотвори́, да не на́чнет глаго́лати каменосерде́чный род евре́йский: а́ще бы Сей Бог был, или́ Сын Бо́жий, не бы разори́л зако́на и проро́к. Да того́ ра́ди и сие́ сотвори́, повину́яся закон́у: зако́н бо беззако́нных ра́ди дан бысть, да суда́ ра́ди боя́щеся сохраня́т зако́н. И сие́ же бе пи́сано в зако́не: жена егда́ ражда́ше де́тищь, не веля́ше ей зако́н я́ко нечи́сте входи́ти в це́рковь до четы́редесяти дней. Свята́я же Дева и Богоро́дица, вы́ше обы́чая челове́ча ро́ждши, не от по́хоти плотски́я, но от Свята́го Ду́ха заче́нши, па́че смы́сла, Сло́ва Бо́жия вопло́щшагося неизрече́нно, во двою́ соверше́на естеству́. И бысть вне, зако́н храня́щи до четы́редесяти дней, и не входя́щи во свята́я святы́х, а́нгелом блюдо́ма, и посе́м храни́ма во Еги́пте от детоуби́йства И́родова. Уме́ршу же И́роду, а́нгел Госпо́день яви́ся во сне Ио́сифу во Еги́пте, глаго́ля: Воста́в, поими́ Отроча́ и Ма́терь Его́, и и иди́ в зе́млю Изра́илеву, изомро́ша бо и́щущии ду́шу Отроча́те. Та́ко бо ско́ро конча́ется живо́т противля́ющихся Бо́гу. Те́мже молю́ вы: отсецы́те от себе неподо́бныя мы́сли, и я́ко щит ве́ру прие́мше, укрепи́мся на безбо́жную лесть: да не яви́мся де́лы злы́ми с Го́сподем борю́щеся, я́коже дре́вле И́род: Но па́че да бу́дем поспе́шницы Бо́гу, лю́бяще Его́ всем се́рдцем свои́м, и бли́жняго я́ко и себе́, я́коже рече́ Госпо́дь. Ки́и же суть бли́жнии на́ши? Не си́и ли, с ни́миже сотвори́м ми́лость: слепи́и, хроми́и, а́лчнии, стра́ннии, и́хже Госпо́дь бра́тию нарече́? На тех бо а́ще сотвори́м ми́лость, то ти́и нам отве́рзут ра́йския две́ри, и без студа́ введу́т в поро́ду, а́ще не ску́постию сотвори́мся. Сам бо ны Госпо́дь в ца́рство зовы́й глаго́лет: Бу́дите ми́лостиви, я́коже и Оте́ц ваш небе́сный ми́лостив есть. Бу́дите сы́нове Вы́шняго, и прича́стницы Ца́рствия Его́. Ви́дите ли бра́тие, ка́ко Бог сы́ны своя́, ми́лостивыя нарица́ет? Те́мже послу́шающе святы́х Его́ слове́с, напи́шем на сердца́х на́ших, да услы́шим глаго́люща Его́: Прииди́те благослове́ннии Отца́ моего́, приими́те угото́ванное вам Ца́рство от сложе́ния ми́ра. Тому́ прии́мницы бу́дем, славяще Святу́ю Тро́ицу, Отца́ и Сы́на и Свята́го Ду́ха, ны́не и присно, и во ве́ки веко́в. Ами́нь.