Вся исполня́я Госпо́дь наш Иису́с Христо́с, да́же на небеси́ и на земли́, тогда́ к мо́рю прии́де, хотя́ освяти́ти Свои́ми стопа́ми и просла́вити и почести́ водно́е естество́. А́бие же мо́ря я́дра просте́р, с ра́достию прия́ Го́спода, глаго́ля: «Прииди́те вся живо́тная, ма́лая с вели́кими, и простира́юще поклони́теся, И́же испе́рва ны сотвори́ и живо́т нам дарова́. Вси проти́внии ду́си Прише́дшаго вострепещи́те, и вся ни́жняя и ви́хри умолчи́те, и прише́дше поклони́теся си́лы вели́честву. И вси студенцы́ и ве́три устро́йтеся, и вся во́лны утиши́теся, и Го́спода животу́ и сме́рти с ра́достию приими́те. Кто возвести́т вселе́нней днесь, я́ко по пучи́не хо́дит Госпо́дь? Возвесели́хся от Вы́шняго, я́ко херуви́м святе́йши бых Бо́жиим прише́ствием и серафи́мскую посте́лю прия́х, я́ко у́бо Седя́щаго на крилу́ ве́тренюю зде и́мам ходя́ща, прикаса́ющагося версе́х мои́х. Аз и́мам храня́ща Су́щаго превы́шша всея́ тва́ри, Сего́ на свое́м ло́не и́мам вмеще́на и пе́ша ходя́ща. Ны́не же у́бо ктому́ не нареку́ся мо́ре, но купе́ль небе́сная. Се бо уже́ бых светле́е свещи́, луча́ испуща́я небе́сныя. Ны́не уподо́бихся со́лнцу, луча́ пуща́ющу. Ны́не бых не́бо, Творца́ име́я» - и я́ко вся тварь веселя́шеся вку́пе, земля́ и мо́ре, и небе́сная, и вси светя́хуся благода́тию. Заблу́ждьшии возвраща́хуся, и гре́шнии поми́ловахуся, и нечести́вии благочести́ви быва́ху, боля́щии в здра́вие прихожда́ху, ме́ртвии востая́ху, бе́си отгони́ми быва́ху, и неду́зи отбега́ху, и смерть ужаса́шеся, и держи́мии от врага́, ви́девше сла́ву Го́спода прише́дша, изреша́тися от уз моля́ху. И вся тварь Христо́вым прише́ствием на зе́млю освяща́шеся, и от ско́рби в весе́лие прилага́шеся, и от тле́ния на нетле́ние гото́вяшеся креще́нием Го́спода на́шего Иису́с Христа́, Ему́же сла́ва, ны́не и при́сно и во ве́ки веко́в. Ами́нь.