Стихи́:
Я́ко и в честь Иу́сту яви́ся мечь,
И глава́ Иусти́ну преклони́ся.
Боже́ственый Харито́н и Хари́та де́вственицы,
Посе́чени бы́вше, раздели́ша боже́ственыя да́ры.
Благосмотрели́в Евелпи́ст бя́ше по и́стине,
Я́коже жре́бий принесе́ Бо́гу се́ченую главу́.
Ору́жие к страждба́м бя́ше Иера́кс,
Посе́чен же лев бысть душе́внаго спасе́ния.
Пео́н, бия́й злочести́вую веру словесы́,
Руко́ю меча́ о́страго по ши́и бие́н быв.
Удруче́ния же и ты удесы́ ссе́чеными,
Хотя́ лу́чшее Валериа́не главо́ю.
Ти святи́и живя́ху в Ри́ме уча́ще о и́мени Иису́с Христо́ве. И я́ти бы́вше от епа́рха гра́дскаго. И затворе́ни бы́ша в темни́цы. И по мно́зех днех из темни́цы изведе́ни бы́ша. Предста́ша епа́рху. И вопроси́ епа́рх Иусти́на. И по мно́гих и ине́х воспроси́ глаго́ла рцы ми Иусти́не а́ще убье́н быв и усе́чен вся извести́л ли еси́ я́ко хо́щеши взы́ти на не́бо. И рече́ ему́ Иусти́н. Ей наде́юся насле́дити небе́сное Ца́рствие. А́ще прете́рплю успе́шно сия́ му́ки. И епа́рх рече́ се ли помышля́еши я́ко взи́деши на небеса́ и при́меши возда́ние не́ких благ. И рече́ Иусти́н не помышля́ю сего́ про́сто но опа́сно извести́х. Тогда́ епа́рховым повеле́нием со Харито́ном и со ине́ми главу́ его́ усекну́ша.