При сем блаже́нем отцы́ Венеди́кте еди́ною у́бо по обы́чному житию́ не иму́щим им ма́сла ра́зве сткля́ницы еди́ной. Прии́де к нему́ еди́н, моля́ся и прося́ ма́сла древя́наго. Ди́вный же сей мужь на уме́ си положи́в подая́ти же и растача́ти на земли́, и да на небеси́ у́зрят я́, о́ное ма́лое ма́сло повеле́ прося́щему да́ти. Слуга́ же его́ обеща́ся вда́ти и не вда проси́вшему. По трех же днех возва́ преподо́бный слугу́ своего́ и рече́ ему́: "Ма́лое о́ное ма́сло дал ли еси́ проси́вшему". Отвеща́ слуга́: "Ни, не дах бра́тия ра́ди, не иму́щим им никоея́ же уте́хи". Тогда́ святы́й прогне́вався, повеле́ стекля́нный сосу́д с ма́слом изврещи́ око́нцем с горы́, я́ко про́клято ослуша́ния ра́ди. И́же повеле́ние сотво́рше верго́ша стекля́ницу с ма́слом с горы́. Дале́че па́дши же до́ле стекля́ница на ка́мени не разби́ся и ма́сло не пролия́ся. Е́же уве́дав святы́й и повеле́ проси́вшему да́ти. Ви́дев же Бог превели́кую его́ ми́лость и из стра́ха на за́поведех Его́ ка́ко па́че себя́ прося́щим попече́ся. Госпо́дь же ка́ди все в той час напо́лни ма́сла, я́коже и на зе́млю иска́пати. Тогда́ позва́ ослу́шавшагося прости́ и́ и поучи́ глаго́ля: "Ча́до, истяжи́ ве́ру несумне́нну, досто́йну мни́шеския за́поведи. Се бо ви́дел еси́ ча́до благода́ть Бо́жию. И отсе́ле не бу́ди неве́рен, но ве́рен о Христе́ Иису́се".