Во гра́де Севасти́и, иде́же глаго́лется погребе́ну бы́ти те́лу Иоа́ннову, Лука́ благове́стник прише́д, десну́ю ру́ку проро́ческаго те́ла отъи́м, и ко своему́ гра́ду Антиохи́йскому принесе́, мно́га чудеса́ ей творя́щи.

Поне́же и змий бя́ше не́кий, гнездя́ся в неко́торем от тех преде́л, ему́же и́же во гра́де живу́щии лю́дии е́ллинстии, бо́га того́ иму́ще, же́ртвами бо наро́читейшими почита́юще. Вре́мени же мину́вшу, до́йде жре́бий до не́коего христиани́на, е́же да́ти свою́ дщерь на снеде́ние зми́ю. И́же змий он, из гнезда́ исходя́, и безнаде́жно явля́я себе́ виде́ние, и вельми́ зия́я, я́ди ча́я. Отрокови́цы же оте́ц стена́нием и воздыха́нием моля́ше Бо́га и Его́ Предоте́чу, е́же изба́витися отрокови́це го́рькия сме́рти. И се на се́рдцы, е́же умо́м домы́слився, про́сит е́же поклони́тися святе́й руце́ Предоте́чеве. И сему́ бы́вшу, да внегда́ хотя́ше ю́ целова́ти, и прини́к тай, и отхапи́ ма́лаго перста́ члено́к зубы́ свои́ми. И жела́емаго получи́в, изы́де из це́ркви. И уже́ дни же́ртвеному наста́вшу, прии́де оте́ц, отрокови́цу веды́й. И людско́му же позо́рищу собра́вшуся, и а́бие же бы́вшема и́ма близ зми́я, и уже́ ви́дев его́ зия́юща и пожре́ние ча́я, е́же поглоти́ти, свяще́ннаго о́ного перста́ члено́к вверг в се́рдце горта́ни его́, и его́же вше́ствием внеза́пу смерть нань нападе́ и у́мре.

Глаго́лет же ся в день Воздви́жения честна́го Креста́ пра́зднику, и сию́ двиза́ти честну́ю ру́ку от архиере́я. И внегда́ двиза́еме, овогда́ простира́тися, овогда́ сгиба́тися, да внегда́ просте́рта бу́дет, изоби́лие плодо́м явля́тися, внегда́ ли ску́тана бу́дет, пу́стоши бы́ти и ску́дости. Сего́ ра́ди и мно́гими же времены́ ца́рствующии жела́ние имя́ху, во одержа́ние о́нем бы́ти ей, изря́днейшее Константи́ну и Рома́ну Багряноро́дныма. Тем и сим ца́рствующим, от не́котораго диа́кона це́ркве Антиохи́йския, И́ову нарица́емому, честны́я руки́ изнесе́ния и принесе́ние бысть в той вече́рний час, во́ньже освяще́ние вода́м обы́чай соверша́ти Христиа́ном преда́сться. Ею́же христолюби́вии ца́рие с любо́вию целова́вше, в ца́рских положи́ша.

Соверша́ет же ся собо́р его́ в Фораки́и.