Помы́слите бра́тие, стра́шный он Суд, егда́ прии́де день он, прии́дет же и нощь о́на стра́шная, па́че же нощь гре́шных, а день пра́ведных, егда́ разори́тся позо́рище, разы́дутся о́брази зли́и и лжи. Тогда́ искуси́тся ки́йждо, и делеса́ его́, и честь его́, и князь, и царь, муж и жена́, егда́ жития́ воспро́сит от нас, и до́брых дел, а не сла́внаго вели́чествия, нищеты́ или ху́дости. Мне, рече́т, делеса́ даждь: а́ще и раб еси́, свобо́днаго бо́лий бу́деши: а́ще ли жена́, му́жа бо́льши бу́деши по зако́ну Бо́жию и по написа́нию. Да отве́ржемся себе́ и своих воль, и да после́дуем Бо́гу. О́ коли́ко возста́ви мо́ре в житии́, и дея́нии пло́ти сея́? коли́ко волн сотвори́? Коли́ко мяте́жей? Коли́ко ветро́в? Коли́ко утопа́ний? Коли́ко беззако́ний? Коли́ко грехо́в? Коли́ко напа́стей и слез? Коли́ко зла во всех граде́х? Коли́ко в до́мех, и на то́рзе сваро́в? И что по́мощь челове́ча, или си́ла его́? Вся стра́ха напо́лнена суть: рожде́ние его́ болезнь, и смерть стра́шна, и я́же по сме́рти неизглаго́ланна, и неисповеди́ма притяжа́ния в се́рдце на́шем до́брая и зла́я: да а́може преклоняе́тся мысль, та́мо и яре́м притя́гнет. Уда́ри поспе́шне, да отве́рзется тебе́ ско́ро. Помяни́, я́ко не по мно́зе ле́те оста́виши вся видимая, не́бо и зе́млю, и челове́ки, и делеса́. Помяни́, я́ко ничто́же еси́ те́лом, но и душе́ю, ма́ла скорбь возмяте́т тя: ма́ла боле́знь воспали́т тя, сло́во про́сто огроми́т тя. Почто́ же у́бо не омерзе́ ти житие́ се? Аз же ти глаго́лю: я́ко пресели́тися до́лжен еси, и горе́ во врате́х небе́сных сотвори́ти себе́ ку́щу, и ту во ве́ки пребыва́ти. Но моли́ся Бо́гу и до сме́рти, да ми́лостию прии́мет тя, и в то вре́мя отве́рзет ти ско́ро: доне́леже на земли́ еси́, приклони́ коле́на к Бо́гу. Горе́ ду́шу име́й, и лицем́ при́сно покрыва́й зе́млю, да при́зрит тя: я́ко па́че тружда́яся пребу́ди в моли́тве. Да ели́ко мо́жеши, отве́ржи сия́ привре́менная: о́на помина́й прииду́щая, зла́я же и до́брая. О́на бо страх Бо́жий прино́сят, а сия́ окра́дают дела́ душе́вная. Си́ры бо есмы́ вси, и никого́же им́амы, но то́чию Бо́га Помо́щника и Поспе́шника: те́мже расплева́вше вся, попеце́мся о себе́. Помяни́ грехи́ твоя́, и осужде́ние твое́. Помяни́, я́ко челове́к еси́ сме́ртен, и боле́знен, и стра́стен, скверна́в и нечи́ст. Помяни́, я́ко челове́к еси́ в житии́ печа́льне, и бед испо́лнене, и мно́ги погу́бльшем до́брыя и злы́я, му́дрыя и нему́дрыя, бога́тыя и ни́щыя. Помяни́, я́ко челове́к еси́ име́я ко́сти смире́ны от ногу́ и до главы́, не моги́й ни еди́наго дне труда́ понести́, и ни еди́ныя но́щи побде́ти. Помяни́, коли́ко еси́ согреши́л Бо́гови, в де́лех и в словесе́х, и в по́мыслех. Помяни́, я́ко со львом, и со змие́ю бо́решися день и нощь. Помы́сли, коли́ко есть под земле́ю душ, яже преоби́деша страх Бо́жий, и не получи́ша поко́я моля́щеся, но в до́льних земли́ пла́чутся блужений свои́х, и ле́ности, и пита́ний, и прока́зства свои́х кото́р. Помяни, я́ко пома́ле умре́ти и́маши и осуди́тися, не преста́й глаго́ля, но в своей́ души́ напиши́ си малое сие́ сло́во на сердце твое́м, и обяжи́ е́ на твое́й вы́и: «Согреши́х Го́споди, поми́луй мя». Лу́чше ти есть сие́ венца́ царе́ва, о́но бо в му́ку вво́дит, а сие́ в жизнь ве́чную введе́т. В сих поуча́йся, и в сих при́сно бу́ди. Ами́нь.