Стихи́:

Ки́ру спострада́вый Иоа́нн к мечу́

Сей чудоде́йствует и по посече́нии Кир

Кир и Иоа́нн посе́чени бы́ша в три́десять пе́рвый.

Ма́ти ди́вная со треми́ дще́рьми

Любве́ ра́ди вся́ческим умро́ша мече́м.

Си́и святи́и му́ченицы Кир и Иоа́нн бы́ше при Диоклитиа́не царе́. И уб́о святы́й Кир бя́ше от Александри́и, Иоа́нн же от Еде́са. И обдержа́щаго ра́ди гоне́ния, и христиа́нскаго побие́ния, ко Арави́йскому мо́рю ме́сто изобре́т Кир, и в мона́шеский о́браз обо́лкся, и та́мо живя́ше. Иоа́нн же во Иерусали́ме быв, и о чудесе́х свята́го Ки́ра слы́шав, [и́бо бя́ше вся́кия неду́ги и вся́кия боле́зни исцеля́я,] прии́де во Александри́ю, и та́мо по прослу́тию доше́д, и пребыва́ше ту с ним. Я́те же бы́вшей жене Афана́сии нари́чемей с треми́ ея́ дще́рьми, Феодо́тиею, и Феокти́стиею, и Евдокси́ею, ве́ры ра́ди Христо́вы, и хотящым суди́щу предста́ти, реко́ша святи́и боя́щеся, дабы́ во страдании я́ко жена́м су́щым, и вели́чия по́двига не устраши́тися: и прише́дше дерза́ти их творя́ху, и к муче́нию подвиза́ху. Я́ти же бы́вше и ти́и, и Го́спода на́шего Иисус́а Христа́, Бо́га Ис́тиннаго испове́даху, и в томле́ния мно́га обложе́ни бы́вше: и ку́пно со святы́ми жена́ми мече́м главы́ их отсеко́ша. Соверша́ется же собо́р их, в тех муче́нии су́щем в Фораки́и.

Стихи́:

Ка́мением ве́лием удеса́ сокруше́ны трие́ до́блии,

Яви́шася трие́ у́ды те́ла Христо́ва:

Добр изнача́ла Клавди́е Го́сподеви,

Пло́ти подаю́ще ру́це и но́зе:

Пе́щи боле́зненаго венца́,

Сни́ди, Диодо́ре, венча́йся:

[А́ще мече́м стра́ха утвержу́ся,]

[К]а́ко Бог [не] утверди́т мя, Серапио́на?

Омы́йся мо́рем го́рькою ба́нею, П аппи́е,

И сла́дости вы́шния пи́щи получи́ши.

Си́и бяху при Де́кии царе́, и Христо́ва ра́ди испове́дания я́ти бы́вше, и приведе́ни Те́ртию анфипа́ту в Кори́нфе нача́льнику Елла́дскому. Бя́ху же святи́и от Кори́нфа, и мно́гими друче́нии разли́чно кончи́ны прия́ша. Виктори́н бо, и Ви́ктор, и Ники́фор, в сту́пу ка́менну вложены́, и ве́лием ка́мением вся удеса́ их столко́ша, и та́ко преда́ша ду́шы. Клавди́ю же отсе́чене ру́це и но́зе, от жития́ пре́йде. Диодо́р же огне́м кончи́ну восприи́м. Серапио́ну же главу́ отсеко́ша. Паппи́я же в мо́ре вве́ржен, соверши́ муче́ние.

Стихи́:

Юнце́м Трифе́на содробле́ная те́лом,

И к пи́щи по́слана еси́ неизрече́нней.

Та бя́ше от гра́да Кизи́ческаго, и́же у Еллиспо́нта лежи́маго: дщи Анаста́сия сигкли́тика, и ма́тере Сокра́тии, христиа́нома су́щема. Прииде же сама́ на муче́ние, ни от кого́же приведена́: укори́вши бо ме́рзкия и́долы, и и́хже я́ко бо́га чту́щих безумно блудя́щих, и отступи́ти от су́етства поуча́ше, и к Бо́гу и́стинному обрати́тися моля́ше. Того́ ра́ди повеле́вшу Кеса́рию иге́мону, в пещь о́гнену вве́ржене бы́ти. И оттду пресла́вно изба́влена, и на высо́це дре́ве обе́шена бысть, и к до́ле стоя́щым гво́здием низве́ржена. Та́же звере́м вдан́а бысть. И у́бо зве́рие той не косну́вшася. По́слежде же юнцу́ зате́кшуся, и ро́гом ту растерза́в низложи́. Глаго́лют же сие́: я́ко иде́же кровь ея́ истече́, исто́чнику водно́му исте́кшу ту: от него́же по е́же роди́ти жена́м, или́ ското́м не име́ющым ко́рму, поче́рпше и пи́вше, или́ скот напои́ти: абие и младе́нцем млеко́ вельми́ источи́ти во сла́ву Бо́гу.

Помы́слите бра́тие, стра́шный он Суд, егда́ прии́де день он, прии́дет же и нощь о́на стра́шная, па́че же нощь гре́шных, а день пра́ведных, егда́ разори́тся позо́рище, разы́дутся о́брази зли́и и лжи. Тогда́ искуси́тся ки́йждо, и делеса́ его́, и честь его́, и князь, и царь, муж и жена́, егда́ жития́ воспро́сит от нас, и до́брых дел, а не сла́внаго вели́чествия, нищеты́ или ху́дости. Мне, рече́т, делеса́ даждь: а́ще и раб еси́, свобо́днаго бо́лий бу́деши: а́ще ли жена́, му́жа бо́льши бу́деши по зако́ну Бо́жию и по написа́нию. Да отве́ржемся себе́ и своих воль, и да после́дуем Бо́гу. О́ коли́ко возста́ви мо́ре в житии́, и дея́нии пло́ти сея́? коли́ко волн сотвори́? Коли́ко мяте́жей? Коли́ко ветро́в? Коли́ко утопа́ний? Коли́ко беззако́ний? Коли́ко грехо́в? Коли́ко напа́стей и слез? Коли́ко зла во всех граде́х? Коли́ко в до́мех, и на то́рзе сваро́в? И что по́мощь челове́ча, или си́ла его́? Вся стра́ха напо́лнена суть: рожде́ние его́ болезнь, и смерть стра́шна, и я́же по сме́рти неизглаго́ланна, и неисповеди́ма притяжа́ния в се́рдце на́шем до́брая и зла́я: да а́може преклоняе́тся мысль, та́мо и яре́м притя́гнет. Уда́ри поспе́шне, да отве́рзется тебе́ ско́ро. Помяни́, я́ко не по мно́зе ле́те оста́виши вся видимая, не́бо и зе́млю, и челове́ки, и делеса́. Помяни́, я́ко ничто́же еси́ те́лом, но и душе́ю, ма́ла скорбь возмяте́т тя: ма́ла боле́знь воспали́т тя, сло́во про́сто огроми́т тя. Почто́ же у́бо не омерзе́ ти житие́ се? Аз же ти глаго́лю: я́ко пресели́тися до́лжен еси, и горе́ во врате́х небе́сных сотвори́ти себе́ ку́щу, и ту во ве́ки пребыва́ти. Но моли́ся Бо́гу и до сме́рти, да ми́лостию прии́мет тя, и в то вре́мя отве́рзет ти ско́ро: доне́леже на земли́ еси́, приклони́ коле́на к Бо́гу. Горе́ ду́шу име́й, и лицем́ при́сно покрыва́й зе́млю, да при́зрит тя: я́ко па́че тружда́яся пребу́ди в моли́тве. Да ели́ко мо́жеши, отве́ржи сия́ привре́менная: о́на помина́й прииду́щая, зла́я же и до́брая. О́на бо страх Бо́жий прино́сят, а сия́ окра́дают дела́ душе́вная. Си́ры бо есмы́ вси, и никого́же им́амы, но то́чию Бо́га Помо́щника и Поспе́шника: те́мже расплева́вше вся, попеце́мся о себе́. Помяни́ грехи́ твоя́, и осужде́ние твое́. Помяни́, я́ко челове́к еси́ сме́ртен, и боле́знен, и стра́стен, скверна́в и нечи́ст. Помяни́, я́ко челове́к еси́ в житии́ печа́льне, и бед испо́лнене, и мно́ги погу́бльшем до́брыя и злы́я, му́дрыя и нему́дрыя, бога́тыя и ни́щыя. Помяни́, я́ко челове́к еси́ име́я ко́сти смире́ны от ногу́ и до главы́, не моги́й ни еди́наго дне труда́ понести́, и ни еди́ныя но́щи побде́ти. Помяни́, коли́ко еси́ согреши́л Бо́гови, в де́лех и в словесе́х, и в по́мыслех. Помяни́, я́ко со львом, и со змие́ю бо́решися день и нощь. Помы́сли, коли́ко есть под земле́ю душ, яже преоби́деша страх Бо́жий, и не получи́ша поко́я моля́щеся, но в до́льних земли́ пла́чутся блужений свои́х, и ле́ности, и пита́ний, и прока́зства свои́х кото́р. Помяни, я́ко пома́ле умре́ти и́маши и осуди́тися, не преста́й глаго́ля, но в своей́ души́ напиши́ си малое сие́ сло́во на сердце твое́м, и обяжи́ е́ на твое́й вы́и: «Согреши́х Го́споди, поми́луй мя». Лу́чше ти есть сие́ венца́ царе́ва, о́но бо в му́ку вво́дит, а сие́ в жизнь ве́чную введе́т. В сих поуча́йся, и в сих при́сно бу́ди. Ами́нь.