Сей бя́ше еги́птянин ро́дом, благоро́дных и боголюбе́зных роди́телей сын, сро́дник же сый Фео́филу, и Кири́ллу, Александри́йским епи́скопом. Сей пи́сменам боже́ственыя прему́дрости, и вне́шним вельми́ извы́к: премно́гая написа́ния, и сло́ву и па́мяти досто́йная, любонауче́ным оста́ви. Оста́вль вся́кое бога́тство, и рода све́тлость, и изоби́лие жития́, дости́г го́ру Пилуси́йскую, и в мона́шеское вшед житие́. Та́мо же упражня́яся бя́ше, и к Бо́гу прити́ча, всю вселе́нную боже́ственным словесы́ свои́ми уча́ просвеща́ше. Согреша́ющих обраща́я, испра́вленыя подтвержа́я, непокаря́ющихся же сече́нием боже́ственных свои́х обличе́ний к доброде́тели подви́же. Но и царя́ ко вселе́нскому удобре́нию, воспомина́яй наказу́яше. Но оба́че и всем того́ вопроша́ющым, боже́ственных писа́ний рече́ния, прему́дренно пове́дуя. Глаго́лют же сие́, я́ко бы́ти еписто́лиям его́ до десяти́ ты́сящь. Сей у́бо про́чее добре́йше поживе́, и по Бо́зе жи́тельствовав, в глубо́це ста́рости житие́ оста́ви.