Стихи́:

Пилусио́те ра́дуйся, ра́дуйся мно́жайшее:

Ка́ла совле́кся, и ра́дость и́стинную получи́в:

Иси́дора в четве́ртый положи́ша зна́мением не́мощным.

Сей бя́ше еги́птянин ро́дом, благоро́дных и боголюбе́зных роди́телей сын, сро́дник же сый Фео́филу, и Кири́ллу, Александри́йским епи́скопом. Сей пи́сменам боже́ственыя прему́дрости, и вне́шним вельми́ извы́к: премно́гая написа́ния, и сло́ву и па́мяти досто́йная, любонауче́ным оста́ви. Оста́вль вся́кое бога́тство, и рода све́тлость, и изоби́лие жития́, дости́г го́ру Пилуси́йскую, и в мона́шеское вшед житие́. Та́мо же упражня́яся бя́ше, и к Бо́гу прити́ча, всю вселе́нную боже́ственным словесы́ свои́ми уча́ просвеща́ше. Согреша́ющих обраща́я, испра́вленыя подтвержа́я, непокаря́ющихся же сече́нием боже́ственных свои́х обличе́ний к доброде́тели подви́же. Но и царя́ ко вселе́нскому удобре́нию, воспомина́яй наказу́яше. Но оба́че и всем того́ вопроша́ющым, боже́ственных писа́ний рече́ния, прему́дренно пове́дуя. Глаго́лют же сие́, я́ко бы́ти еписто́лиям его́ до десяти́ ты́сящь. Сей у́бо про́чее добре́йше поживе́, и по Бо́зе жи́тельствовав, в глубо́це ста́рости житие́ оста́ви.

Стихи́:

Похоте́ся соста́вленому ме́ру жития́,

И Нико́лу прия́т от жития́

Сей преподо́бный нарица́шеся от Кри́тскаго о́строва, сро́дника же своего́ Фео́дора восхоте́ ви́дети, до́йде в Константи́нь град, и того́ приобщи́вшася бра́тии студи́йстей обре́т: и прия́т на ся мона́шеское житие́, и вся́кое наказа́ние прошед, и мона́шескаго жития́ зна́мения испы́тнейше изве́дев. И поста́влен бысть презви́тер, и бя́ше дости́гл в изя́щную прему́дрости доброде́тель. Что же по сем? Во изгна́ние с Фео́дором оби́тели настоя́щаго, божественный Никола́й осужде́н бысть. И от та́мо при́званы бывше, волу́ями жи́лами бие́ни бы́ша, Львом звероимени́тым христоненави́стником, я́ко покло́нницы боже́ственных ико́н су́ще. Та́же в темни́цу всажде́ны, и па́ки вопроше́ни, и бие́ни бы́ша: и три ле́та в темни́це претерпе́ша, гла́дом, и жа́ждею, и нагото́ю страда́ша. И в Сми́рну по́слани быша, и та́мо бие́ни, и в темни́цу вве́ржени бы́ша, и но́зе их в кла́де заби́ша. И два́десятим ме́сяцем мимоше́дшым, сконча́ житие́ Лев, и та́мошнему суду́ по́слан бысть. Тогда́ блаже́ннии Христо́вы испове́дницы изведе́ни бы́ша, и в Халкидо́н достиго́ша: и пресла́внаго патриа́рха Ники́фора целова́вше, пребыва́ху ку́пно. И пома́ле Михаи́лу ке́сарю повеле́вшу, в пру́сы прогна́ни бы́ша: та́же во Акри́т, иде́же многострада́льный Фео́дор, и ко Го́споду отъи́де. И пото́м Фео́филу иконобо́рцу ца́рство прии́мшу, па́ки на благочести́выя рать ве́лию подви́же. И тому́ Фео́филу житие́ сво́е зле скончавшу. И по нем прии́м ца́рство сын его́ Михаи́л, и благочести́вая ма́ти его́ цари́ца Феодо́ра, и смире́нию тве́рду бы́вшу. И по сих Вас́илий и́же от Македо́нии, ца́рство прия́т: преподо́бнаго сего́ и многострада́льнаго Никола́я, мно́гими мольба́ми и уте́хами увеща́в, игу́мена тоѓо в Студи́и поста́ви. И мно́ги у́бо вели́кий по́двиги подъя́т, и от мно́ги страдьбы́ изнемо́г: се́дмьдесять, и пять лет соверши́в, и с ми́ром почи́.

Стихи́:

Где сие́ стра́шное страда́льцем Госпо́дним?

Глаго́лаше показа́ Авра́мие мечь, не бо́йся главна́го посече́ния.

В пя́тое лето и́же в Перси́де егда́ на христиа́ны гоне́нию бы́вшу, ят бысть Авра́мий от старе́йшины волхво́в, и от него́ ну́димь бя́ше отврещися Христа́, и поклони́тися со́лнцу. Блаже́нный же глаго́лаше к нему́: Окая́нне и стра́стне, ка́ко не лени́шася неподо́бное повелева́яй твори́ти? Коли́ко неистовле́ние есть, еже оста́вити Творца́, и поклони́тися тва́ри? Несть ли со́лнце Бо́га моего́ творение, безу́мне? Такови́и глаго́ли нема́ло возмято́ша скве́рнаго. И а́бие совлещи́ свята́го повеле́, и по земли́ того́ просте́рти, и ди́виим того́ же́злием би́ти, и сему́ бы́вшу. И я́ко ви́де ста́рей волхво́в до́блественне терпя́ща свята́го, наипа́че же о бию́щих моля́щася и глаго́люща: Го́споди, не поста́ви им греха́ сего́, не ве́дят бо что творя́т, мече́м главу́ его́ отсещи́ повеле́. И сконча́ся святы́й священному́ченик Авра́мий, в ве́си глаго́лемей Фелма́н ме́чным посече́нием.

Брат не́кто живы́й в кинови́и, си́речь, во о́бщем житии́, уныва́я во уче́нии, и вопроси́ отца́ своего́ глаго́ля: Что о́тче тружда́юся в кни́гах, и ничто́же разуме́ю, ему́же служу́? Он же отвеща́ ему́ глаго́ля: Ча́до, о́вцы егда обря́щут па́жить, в сла́дость ядя́т зело́, и ча́сто не сожва́ему пи́щу поглота́ют, тща́щися ка́яждо, да мно́жайшая похва́тит, и вложи́т в себе́ пи́щу, и осо́бь про́чее ста́вши жуе́т пи́щу, изрыга́ющи извну́трь: Та́ко и ты ча́до, елиќу у́бо по́мощь и бла́го вре́мя и́маши, учи́ся ели́ко мо́жеши без ле́ности боже́ственным кни́гам, Бо́гу подава́ющу ти: или́ от бесе́д ста́рец слышав навы́кнеши, или́ сам навы́кнув вопроси́ши: или́ от поуча́ющих когда́ кото́рых во свято́е: или Сам Госпо́дь в безмо́лвии глаго́лати и́мать в се́рдце твое́м. Но у́бо ны́нешняго от Бо́га да́ннаго ти вре́мени, и си́лы, и не погуби́ уны́нием.