Си́и святи́и Еспе́р и Зо́я бя́ху при Андреа́не царе́, раби́ бы́вше во Итали́и, не́коему и́менем Ката́л, и Тетради́и жене́ его́ су́щим ри́мляном, и́же от Памфили́и тех искупи́вше. Препро́сти душе́ю, и те́мни те́лом, на мно́зе рабо́тати восхоте́шя нечести́вым влады́кам, в ме́сто Творца́ и Соде́теля вся́ческим, поклони́тися и чести́ и́долы. И́бо Кириа́ку и Феоду́лу чя́дом их, к свое́й ма́тери сопребыва́ти, а не к нечести́вым, и от них отлуча́тися и отбега́ти, да не с ни́ми поги́бнут. И сше́дшимжеся им и ре́кшым, я́ко Го́спода на́шего Христа́ кро́вию свободи́тися нам бу́дет. И от ма́тери подтверди́вшеся, идо́ша к Катаи́лу, и Го́спода на́шего Иису́са Христа́ Того́ ре́кше и Соде́теля всему́, бы́вших же в ве́ре его́ честне́йших и па́че про́чих вер челове́к. И подоба́ет бо реќше па́че Бо́гу повинова́тися, не́жели челове́ком. И уди́вльшуся у́бо о сем Катаи́лу. По́слани же бы́шя с ма́терию в мы́тницу к Испе́ру отцу́ ею́. Пото́м же рожде́ние рожде́ному отроча́ти творя́щу Катаи́лу, и от угостовле́ных вин и мяс, воспомяну́ посла́ти им, покуша́шеся, еда́ вку́сят от идоложе́ртвеных. Они́же не вкуси́ша, но псом поверго́ша. Катаи́л же на гнев разгоре́ся, и пе́рвее у́бо де́ти повеле́ пове́сити, и ногты́ желе́зными строга́ти телеса́ ею́. Роди́телие же теша́ху, потвержа́юще я непреда́тися, но терпе́ти до сконча́ния, и к венцу́ муче́ния взира́ти. Та́же сведе́ни бы́вше ку́пно со отце́м и с ма́терию вельми́ бие́ни. Пото́м же пещь запали́вше, и вве́ргше святы́я, иде́же своя́ ду́шя преда́ша Го́сподеви, Нау́трия же отве́рзше пещь, и обрето́ша я́ воображены́ лежа́ща к восто́ку четвероли́чне. Соверша́ет же ся собо́р их во святе́м их муче́нии.