Сей преподо́бный оте́ц наш Симео́н но́вый мирото́чец земны́м ца́рством небе́сное ца́рство измени́вый, и к безсме́ртному ца́рству потече́. Пе́рвее в земли́ свое́й мно́гия монастыри́ созда́. И пе́рвее Пречи́стей Ма́тери Бо́жии храм красе́н, на реце́ Студени́це от основа́ния до трулл, во мра́морех соста́ви, и зла́том украси́. И хлеб свой убо́гим повсегда раздробля́я, свое́ же безчи́сленное бога́тство ни́щым разда́ не щадя́. Ра́шских же и помо́рских земе́ль, я́же под ним одержа́ние свои́м хоте́нием предаде госпо́дствовати Стефа́ну сы́ну своему́. Та́же оста́вив мир, после́дова преподо́бному Са́вве сы́ну своему́: и во святу́ю го́ру вшед, и ту с сы́ном свои́м осо́бь монасты́рь созда́, и храм Святы́я Богоро́дицы Введе́ния, нарица́емый Хиланда́р, и́же есть и до сего́ дне. И стра́ху Бо́жию нау́чься, зако́нно и моли́твами и посто́м всегда́ претерпева́я, в безстра́стие оде́явся, плотски́й ра́зум смири́в, кре́постию боже́ственнаго Ду́ха подвиза́ся до́бре, и толми́ воздержа́ся и постя́ся, я́ко а́нгелом уподо́битися. И еще́ по земли́ ходя́щу, мно́жество чернори́зец от стран собра́ на Бо́жие славосло́вие, иде́же мно́гия на спасе́ние уча́. И та́ко с до́брыми наде́ждами, в ста́рости глубо́це ко Го́споду, Его́же возлюби́, ра́дуяся отъи́де. Тем и по успе́нии его́, за мно́гия его́ доброде́тели, дар чудотворе́ния сподо́бися прия́ти от Бо́га, и мирото́чец бысть: тем и мно́гих чуде́с показа́ си́лу. И по сем сын его́ преподо́бный Са́вва принесе́ его́ во оте́чество свое́, и положи́ че́стно в це́ркви Святы́я Богоро́дицы на ме́сте зово́мом Студени́ческия, ю́же трудом любе́зно сам созда́. И до сего́ дне благочести́вии лю́дие взе́млюще от ра́ки его́ ми́ро, пома́занием его́ разли́чныя неду́ги неду́жных исцелева́ют.