Стихи́:

Бе́гает коне́чное бесконе́чнаго пла́мене,

Мартиниа́н теле́сный погаси́ пла́мень:

В тридеся́тый из телеси́ изы́де Мартиниа́н.

Сей бя́ше от Кесари́и Палести́нския, наче́н по́стническое житие́, осмина́десяте лет во́зраста, в пусты́нях и гора́х преходя́. Соверши́в же во отлуче́нии два́десять и пять лет, и по ины́х мно́гих таков́ое искуше́ние от лука́ваго нань нападе́. Блудни́ца не́кая наложи́вши на ся оде́жду нища́вую, по́йде в го́ру иде́же пребыва́ше святы́й. И бы́вшу ве́черу, наче́нши пла́катися и рыда́ти вельми́, я́ко с пути́ заблуди́вши, и помоли́вши свята́го, е́же прия́ти ю́, да не зубы́ зве́рскими снеде́на бу́дет. О́ному же не бя́ше мо́щно презре́ти ю́, но внутрь введе́ ю́, то́йже во вну́трешнюю ке́ллию отлучис́я. Она́ же блу́дную у́тварь нося́щи, и отложи́вши нищавую оде́жду, украси́ себе́ блу́дною оде́ждею. И вопроше́на бысть преподо́бным: Кто еси́ ты, и ко́ея ра́ди вины́ се́мо пришла́ еси́? Она́ же без сумне́ния рече́: Тебе́ ра́ди, и по́стническаго жития́ ненави́дящи, и всех и́же в зако́не пра́ведны жена́м приобщившымся приложи́вши, призыва́ю тя к смеше́нию. Он же руко́ю мо́лком помаа́в, и в кро́тости быв ужа́сне, и смотря́я ка́ко бы не погреши́ти таково́му соде́янию: но боже́ственною благода́тию сие́ соде́я, и пре́жде паде́ния возведе́ся от паде́жа. Тем же и мно́го хвра́стия собра́, и заже́г е́ вни́де посреде́, наказу́я себе́ и глаго́ля: Убо́гий Мартиниа́не, а́ще мо́жеши гее́нский огнь подъя́ти, сла́сти ме́рзостней возжеле́в, ля́зи с жено́ю. И та́ко опали́в себе́, смири́ теле́сное превзы́тие. Ви́дев же и жену́ о сем уцелому́дрившуся, в монасты́рь о́ну посла́. Сам же от пла́менныя я́звы исцеле́в, и наставлен быв кора́блеником не́ким, и в мо́ре на ка́мень вшед, отстоя́щь от су́ши дне еди́наго плы́тия, и на нем де́сять лет пребы́в, пита́емь бя́ше кора́блеником. И па́ки отту́ду пре́йде, зане́же не́которей отрокови́це на дсце приплы́вши к ка́мени, кораблю́ в мо́ри разби́вшуся. И ем ю́ преподо́бный, возведе́, и поста́ви на ка́мени. Сам же вве́ржеся в мо́ре, та́ко рек: Не мо́жет жи́ти се́но со огне́м. И на плеща́х дельфи́нских носи́мь преста́ к земли́. И отту́ду страны́ и гра́ды проше́д, рек: Бе́гай Мартиниа́не, да не пости́гнет тебе́ напа́сть. И та́ко проразуме́в е́же от сего жития́ сконча́ние, во Афи́ны дости́же: и та́мо быв, ко Го́споду отъи́де. Сла́вному погребе́нию от епи́скопа, и от всего́ мно́жества сподо́бися. Глаго́лют же и о жене́, я́же у́бо с горы́ сни́де, и в монасты́рь вше́дши, преподо́бно пож́ивши чудоде́йствию сподо́б́ися. А и́же в мо́ри на ка́мени да́же и до конца́ житие́ свое́ препроводи́вши, му́жескими оде́ждами приноша́емыми от кора́бленика одева́ема. Соверша́ется же собо́р его́ в честне́м апос́тольстве, свята́го и верхо́внаго апо́стола Петра́, прилежа́щем у святы́я Вели́кия це́ркве.

Сей преподо́бный оте́ц наш Симео́н но́вый мирото́чец земны́м ца́рством небе́сное ца́рство измени́вый, и к безсме́ртному ца́рству потече́. Пе́рвее в земли́ свое́й мно́гия монастыри́ созда́. И пе́рвее Пречи́стей Ма́тери Бо́жии храм красе́н, на реце́ Студени́це от основа́ния до трулл, во мра́морех соста́ви, и зла́том украси́. И хлеб свой убо́гим повсегда раздробля́я, свое́ же безчи́сленное бога́тство ни́щым разда́ не щадя́. Ра́шских же и помо́рских земе́ль, я́же под ним одержа́ние свои́м хоте́нием предаде госпо́дствовати Стефа́ну сы́ну своему́. Та́же оста́вив мир, после́дова преподо́бному Са́вве сы́ну своему́: и во святу́ю го́ру вшед, и ту с сы́ном свои́м осо́бь монасты́рь созда́, и храм Святы́я Богоро́дицы Введе́ния, нарица́емый Хиланда́р, и́же есть и до сего́ дне. И стра́ху Бо́жию нау́чься, зако́нно и моли́твами и посто́м всегда́ претерпева́я, в безстра́стие оде́явся, плотски́й ра́зум смири́в, кре́постию боже́ственнаго Ду́ха подвиза́ся до́бре, и толми́ воздержа́ся и постя́ся, я́ко а́нгелом уподо́битися. И еще́ по земли́ ходя́щу, мно́жество чернори́зец от стран собра́ на Бо́жие славосло́вие, иде́же мно́гия на спасе́ние уча́. И та́ко с до́брыми наде́ждами, в ста́рости глубо́це ко Го́споду, Его́же возлюби́, ра́дуяся отъи́де. Тем и по успе́нии его́, за мно́гия его́ доброде́тели, дар чудотворе́ния сподо́бися прия́ти от Бо́га, и мирото́чец бысть: тем и мно́гих чуде́с показа́ си́лу. И по сем сын его́ преподо́бный Са́вва принесе́ его́ во оте́чество свое́, и положи́ че́стно в це́ркви Святы́я Богоро́дицы на ме́сте зово́мом Студени́ческия, ю́же трудом любе́зно сам созда́. И до сего́ дне благочести́вии лю́дие взе́млюще от ра́ки его́ ми́ро, пома́занием его́ разли́чныя неду́ги неду́жных исцелева́ют.

Стихи́:

Ду́шу предае́т Евло́гие Го́сподеви,

Вопия́ к ней: Го́спода своего́ благослови́.

Сей бя́ше в ца́рство Иракли́я царя́, архиепи́скоп Александри́йский, пре́жде свята́го Иоа́нна Ми́лостиваго. Сотвори́ же и чудеса́ мно́га, от ни́хже есть се: Преподо́бному епи́скопу Лео́нтию написа́вшу Халкидо́нскаго ра́ди собор́а еписто́лию правосла́вия. И проче́т ю́ святы́й Евло́гий, не то́чию похвали́, но и прия́т, и всем пропове́да. Бог же хотя обою́ учреди́ти, посла́ а́нгела во о́бразе архидиа́кона Лео́нтиева, благода́рствуя свята́го Евло́гия, зане́же прия́т я́вльшееся посла́ние. Святы́й же Евло́гий, Бо́жию а́нгелу я́ко челове́ку и архидиа́кону беседоваше. Да я́ко неви́димь бысть от него, та́ко Бо́га благода́рствив, и о чудеси́ па́че того́ благосло́вив. И преподо́бно пожи́в, в ру́це Бо́гу ду́шу предаде́.

Несть пра́ведна, и́же не и́мать ничто́же согреше́ния: и несть гре́шна, и́же не и́мать ничто́же бла́га. А́ще у́бо ви́диши пра́веднаго боля́ща, или́ в напа́сть не́кую впа́дша, не смути́ся: но помы́сли в себе́ и рцы: сей пра́веден есть, и не́что сотворил ма́ло зло я́ко челове́к, того́ ра́ди восприе́млет зде, да та́мо не му́чится. Сего́ де́ля и Авраа́м, поне́же случи́ся Ла́зарю име́ти грехи́, и бога́тому не́что бла́га, что глаго́ла? Восприя́л еси́ ты блага́я, а Ла́зарь зла́я. Ами́нь.