Сей святы́й бя́ше в ца́рство Феодо́сия ма́лаго, нарица́емь от со́лнечнаго восто́ка, схола́стик быв. И прия́т мона́шеское житие́, и на го́ру вшед, глаго́лемый острый холм, близ Халкидо́на, и молча́ше ту: и отто́ле прозвана́ бысть гора́ свята́го Авксе́нтия. Бя́ше же поще́нием терпели́в, и ве́рою правове́рен, и мно́го потруди́вся на е́ресь Евти́хиеву, и Не́сториево злове́рие. Бысть же и в Халкидо́нстем четве́ртом собо́ре, и царе́м чтимь и люби́мь бе, и наро́чит показа́ся. И всем прилуча́ющымся в боле́знех, боже́ственною благода́тию, чудесе́м исто́чник цельбы́ приходя́щым точа́ повсегда́. С ми́ром же почи́в о Го́споде, и положе́н бысть в созда́нней от него́ це́ркви. Соверша́ется же собо́р его́ во оби́тели Каллистра́тове.