Стихи́:

Хлеб я́ко и карми́л Авксе́нтию бя́ше,

Я́вльшуся дре́вле пре́жде кончи́ны Илии́:

Изы́де от сего́ жития́ Авксе́нтие в четве́ртый на́десять.

Сей святы́й бя́ше в ца́рство Феодо́сия ма́лаго, нарица́емь от со́лнечнаго восто́ка, схола́стик быв. И прия́т мона́шеское житие́, и на го́ру вшед, глаго́лемый острый холм, близ Халкидо́на, и молча́ше ту: и отто́ле прозвана́ бысть гора́ свята́го Авксе́нтия. Бя́ше же поще́нием терпели́в, и ве́рою правове́рен, и мно́го потруди́вся на е́ресь Евти́хиеву, и Не́сториево злове́рие. Бысть же и в Халкидо́нстем четве́ртом собо́ре, и царе́м чтимь и люби́мь бе, и наро́чит показа́ся. И всем прилуча́ющымся в боле́знех, боже́ственною благода́тию, чудесе́м исто́чник цельбы́ приходя́щым точа́ повсегда́. С ми́ром же почи́в о Го́споде, и положе́н бысть в созда́нней от него́ це́ркви. Соверша́ется же собо́р его́ во оби́тели Каллистра́тове.

Стихи́:

Естество́м повину́в теле́сным цвете́ц Ма́рон,

Пресажде́н бысть во Еде́мское село́.

Сей непокровен́ное стяжа́в житие́, верх не́которыя горы́ дости́г: и́же от не́которых нечести́вых чтом, и в нем тре́бище бесо́вское изобре́т, и того́ Бо́гу освяти́в в нем пребыва́ше. И не́кую сень ма́лу потче́, в ма́ле же о́ну тре́боваше: боле́зньми ни еди́неми содержи́мь, но и други́я понахожда́ху. Подвигополо́жник же Бог, благода́тию боле́зни преложи́. Бя́ше бо ви́дети огни́цу моли́твами его́ утоля́ему, та́коже и тряса́вицу: и бе́сы прогони́ти, и вся́кия разли́чныя неду́ги, моли́твою еди́ною уврачу́емы. Но и мно́ги монастыри́ созда́в, и мно́гих поще́нием Бо́гу приведе́. Си́це же благоде́лию прилежа́, и ду́шы ку́пно врачу́яй и телеса́. Неду́ги мно́ги престрада́в, и вма́ле поболе́в изы́де от жития́, и с ми́ром ко Го́споду отъи́де.

Стихи́:

Де́йствием свои́м обре́те зва́ние бо́льшее,

Всеиме́нному Авраа́му Авраа́м.

Сей бя́ше в ца́рство Феодо́сия Вели́каго, от гра́да Ки́прскаго, иде́же роди́ся и воспита́ся: и мона́хом бога́тство разда́в. И толи́ко бде́нием и стоя́нием и посто́м те́ло удручи́, я́ко не колеба́ся на мно́га ле́та пребы́в, ника́коже ходи́ти моги́й. Уве́дев же не́которое в горе́ Лива́нстей прилежи́мо ме́сто, и та́мо шед мал храм сотвори́в, за три дни пребы́сть молча́: в четве́ртый же безмо́лвно приходя́. Пе́рвее же от саме́х злочести́вых, пе́рстию мно́гою посыпа́емь быва́ет. Та́же дале́че тому́ повелева́ху ну́жно отъити́, но и лю́ди практо́рие и́же в ве́си су́щей приходя́ще, лю́те его́ друча́ху пода́ния прося́ще. Боже́ственный же Авра́мий, я́же от ине́х подае́мая, тем практо́рием подава́ше, и руга́тельных муче́ний свобожда́шеся. Они́ же преподо́бнаго человеколю́бию подиви́вшеся, це́рковь создаша, и христиа́ны бы́вше: и того́ иере́я быти пону́диша. Он же сотво́рь во́лю их, и до́бре к благоче́стию о́нех напра́вив: па́ки мона́шеское дости́же оби́телище, друга́го тем в себе́ ме́сто святи́теля оста́вив, и в сих просия́в, Ка́рское восприе́млет седа́лище: град же есть се Палести́нский. Но и того́ труды́ мно́гими, и богодухнове́нными уче́нии, Бо́гу в ма́ла ле́та предста́вив. В свое́м же свяще́нничестве коли́ко лет и пребысть, хлеба не вкуси́, ни со́чива, ни зе́лия, водо́ю или огне́м варе́наго, но ло́щики и се́лин, и ели́ка таковы́м подо́бная, пи́щу ку́пно и питие́ творя́ше. Сего́ прослу́тие царь слы́шав, и к себе́ того́ призва́в. И от тогда́ ма́ло вре́мя пожи́в, в том ца́рствующем гра́де Бо́гу ду́шу предаде́. Те́ло же его́ вели́кий благочести́вый Феодо́сий царь, в Кар с че́стию мно́гою отсла́.

Приидо́ша иногда́ мно́зи ста́рцы от Еги́пта ко отцу́ Пи́мену. И се еди́н от су́щих ста́рец име́яше отроча́ бе́сно, и лице́ его́ от де́йства сатанина́ обрати́лося бе на зад. И яко приидо́ша к ста́рцу, вси внидо́ша внутрь. Име́яй же бе́сное отроча́, седя́ше вне ке́ллии, пла́чася. Упраздни́ся же еди́н от ста́рец и изы́де, и ви́де его́ вне ке́ллии седя́ща, и рече́: что пла́чеши челове́че? Отвеща́: ты кто еси́ вопроша́яй мя? Рече́ же мона́х: аз учени́к есмь отца́ Пи́мена. И пове́да ему́ о свое́й напа́сти, ка́ко случи́ся отроча́ти сему́; хоте́х убо к старцу понести́, и убоя́хся, я́ко не восхо́щет ви́дети нас. Ны́не бо я́ко ви́дех собо́р ваш, дерзну́х приити́: и я́коже хо́щеши а́вво поми́луй мя, и поими́ отроча́ сие́ внутрь, и помоли́ся о нем. И пои́м ста́рец отроча́, и вни́де, и нача́т с му́дростию глаго́лати, не приве́д его́ ко отцу́ Пи́мену. Он же не хотя́ше прикосну́тися ему́. Они́ же моли́ша его́ глаго́люще, я́ко и вся, та́ко и ты о́тче. И воздохну́в воста́, и помоли́ся глаго́ля: Бо́же исцели́ созда́ние Твое́, да не одоле́ет ему́ враг: и зна́менав е́ исцели́. Бо́гу на́шему сла́ва, ны́не и при́сно, и во ве́ки веко́в. Ами́нь.