Го́споду Бо́гу зову́щу ны, зако́ны и проро́ки, апо́столы и евангели́сты, па́че же и моля́щу: не подоба́ет бо нам за ле́ность небрещи́ за́поведи Его, и лени́тися о свое́м спасе́нии, да не опозде́нием затвори́тся нам жела́емый черто́г, и мно́го то́лкше без успе́ха пребу́дем, воздыха́юще без по́льзы. Но па́че потщи́мся бра́тие, да пости́гнем верхо́вный град, вы́шний Иерусали́м, и́же есть ма́ти живу́щих всех нас. Страну, в не́йже Свет немерца́яй сия́ет, неусыпа́ющее О́ко, ве́чный благ Да́вец. А́ще у́бо возлю́бленнии со стра́хом и любо́вию присту́пим ко благом́у на́шему Влады́це, то у́зрим все естество́ а́нгел и арха́нгел, и ели́ко бо рачи́тели бы́ша вы́шняго Иерусали́ма, а́бие сса́ти и́мут от сосцу́ утеше́ния его́: от пото́ка бо пи́щнаго напиются. К Тому́ притеце́м, ре́кшему: Приступи́те ко Мне, и прибли́жуся к вам. Послу́шаем Законода́вца, глаго́люща: А́ще гла́са Моего́ послу́шаете, бу́дете Ми лю́дие избра́ннии, ца́рское свяще́ние, язык свят: и бу́дите свя́ти, зане́ Аз Свят есмь Госпо́дь Бог ваш, избра́х вы Себе́ лю́ди изря́дны. Прему́дрость же глаго́лет: Приступи́те ко Мне жела́ющии Мене, и оби́лия Моего́ насы́титеся, и́бо есмь Сла́ждьший ме́да. Яду́щий бо ктому́ не взалчет, и послу́шаяй Мене́ не постыди́тся. И па́ки: Прииди́те и яди́те мой хлеб, и пи́йте вино́, е́же черпа́х вам, оста́вите безу́мие, и жи́ви бу́дете: ищи́те бо свиде́ние ра́зума. И Дави́д глаго́лет: Приступи́те к Нему́, и просвети́теся, и ли́ца ва́ша не постыдя́тся. Апос́тол же глаго́лет: А́ще воста́сте у́бо со Христо́м, то вы́шних ищи́те, иде́же есть Христо́с одесну́ю се́де Отца́, и приво́дит к Себе́. Те́мже уже́ не́сте странни и прише́льцы, но согра́ждане святы́х, и при́снии Бо́гу. Да приступа́ем у́бо к Престо́лу сла́вы Бо́жия, да прии́мем ми́лость, и благода́ть обря́щем во благовре́менную по́мощь. Человеколю́бец же Бог призыва́ет ны, глаго́ля: Прииди́те ко Мне вси тружда́ющиися и обремене́ннии, и аз упоко́ю вы. Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шым: и́го бо Мое́ бла́го, и бр́емя Мое́ легко́ есть. Сие́ же глаго́лющу, и зову́щу ны Самому́ Христу́ Бо́гу на́шему. Ами́нь.