Стихи́:

Незаключе́но ме́сто Тарасия́ прие́млет,

Мирска́го мяте́жа и бу́ри сохра́ньшаго:

В два́десять пя́тый от молвы́ Тара́сие отъи́де.

Сей честны́х ико́н поклоне́ние утверди́, и сим ца́рское нача́льство и гре́ческая власть к честны́м преда́нием святы́х и всехва́льных апо́стол, и вселе́нских собо́ров обрати́ся, и свята́я це́рковь с патриа́ршеским до́мом соедини́ся. Пожи́в сей благочести́вне, и от царей почте́н быв, и монасты́рь свяще́нен об он пол Стено́са созда́, и мно́го и́нок в нем собра́в, и ни́щыя ми́ловав, и до́бре це́рковь упра́вив, за два́десять и два ле́та, и за два ме́сяца, и с ми́ром сконча́ся, и положе́н бысть в свое́м созда́ннем монастыре́. Бя́ше же по всему́ те́лу и подо́бию, подо́бен Григо́рию Богосло́ву: но не бя́ше сей вельми́ сед. Соверша́ется же собо́р его́ во святе́й вели́цей це́ркви.

Го́споду Бо́гу зову́щу ны, зако́ны и проро́ки, апо́столы и евангели́сты, па́че же и моля́щу: не подоба́ет бо нам за ле́ность небрещи́ за́поведи Его, и лени́тися о свое́м спасе́нии, да не опозде́нием затвори́тся нам жела́емый черто́г, и мно́го то́лкше без успе́ха пребу́дем, воздыха́юще без по́льзы. Но па́че потщи́мся бра́тие, да пости́гнем верхо́вный град, вы́шний Иерусали́м, и́же есть ма́ти живу́щих всех нас. Страну, в не́йже Свет немерца́яй сия́ет, неусыпа́ющее О́ко, ве́чный благ Да́вец. А́ще у́бо возлю́бленнии со стра́хом и любо́вию присту́пим ко благом́у на́шему Влады́це, то у́зрим все естество́ а́нгел и арха́нгел, и ели́ко бо рачи́тели бы́ша вы́шняго Иерусали́ма, а́бие сса́ти и́мут от сосцу́ утеше́ния его́: от пото́ка бо пи́щнаго напиются. К Тому́ притеце́м, ре́кшему: Приступи́те ко Мне, и прибли́жуся к вам. Послу́шаем Законода́вца, глаго́люща: А́ще гла́са Моего́ послу́шаете, бу́дете Ми лю́дие избра́ннии, ца́рское свяще́ние, язык свят: и бу́дите свя́ти, зане́ Аз Свят есмь Госпо́дь Бог ваш, избра́х вы Себе́ лю́ди изря́дны. Прему́дрость же глаго́лет: Приступи́те ко Мне жела́ющии Мене, и оби́лия Моего́ насы́титеся, и́бо есмь Сла́ждьший ме́да. Яду́щий бо ктому́ не взалчет, и послу́шаяй Мене́ не постыди́тся. И па́ки: Прииди́те и яди́те мой хлеб, и пи́йте вино́, е́же черпа́х вам, оста́вите безу́мие, и жи́ви бу́дете: ищи́те бо свиде́ние ра́зума. И Дави́д глаго́лет: Приступи́те к Нему́, и просвети́теся, и ли́ца ва́ша не постыдя́тся. Апос́тол же глаго́лет: А́ще воста́сте у́бо со Христо́м, то вы́шних ищи́те, иде́же есть Христо́с одесну́ю се́де Отца́, и приво́дит к Себе́. Те́мже уже́ не́сте странни и прише́льцы, но согра́ждане святы́х, и при́снии Бо́гу. Да приступа́ем у́бо к Престо́лу сла́вы Бо́жия, да прии́мем ми́лость, и благода́ть обря́щем во благовре́менную по́мощь. Человеколю́бец же Бог призыва́ет ны, глаго́ля: Прииди́те ко Мне вси тружда́ющиися и обремене́ннии, и аз упоко́ю вы. Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шым: и́го бо Мое́ бла́го, и бр́емя Мое́ легко́ есть. Сие́ же глаго́лющу, и зову́щу ны Самому́ Христу́ Бо́гу на́шему. Ами́нь.

В се́рдцы кро́ткаго почи́ет прему́дрость, престо́л же безстра́стию душа́ де́тельна. Де́латели зли, восприи́мут мзду злу, де́телем же благи́м, возда́стся мзда бла́га. Положи́вый сеть увя́знет в ней, и скрыва́яй ю́ улови́тся е́ю. У́не есть мирски́й кро́ток, па́че мона́ха я́ра и гневли́ва. Разум погубляет я́рость, долготерпе́ние же собира́ет его́. Я́коже ветр крепок в пучи́не, та́ко я́рость в се́рдцы му́жеви. Моля́йся Богу, убегает напа́стей, непотре́бнаго же се́рдце возмути́тся мысль. Да не обвесели́т тебе́ питие́, ни насыща́йся пи́щами, да не уты́ет плоть те́ла твоего́, и мы́сли скве́рныя да не обсту́пят тебе́. Не рцы: днесь пра́здник, пие́м, и зау́тра Пентико́стия, сотвори́м пра́здник: я́ко несть пра́здника мона́хом, е́же наполня́ти чре́во свое́. Па́сха Госпо́дня, отше́ствие зла: Пентико́стия же его́, воста́ние душа́м. Пра́здник Бо́жий, непомне́ние зла, а злопо́мнящаго прии́мут пла́чи. Пентико́стия же Госпо́дня, воста́ние любве́, ненави́дяй же бра́та своего́, паде́т паде́ние изря́дным. Праздник Бо́жий, ра́зум и́стинный. Внима́я же ра́зуму лжи́ву, у́мрет скве́рнено. У́не есть алка́ти чи́стым се́рдцем, неже праздновати нечи́стою душе́ю. Потребля́яй мы́сли злы́я от сердца своего, сей есть разбива́яй младе́нцы своя́ о ка́мень. Мона́х сонли́в впа́дает в зла́я, бдяй же я́ко птищь есть. Не даждь себе́ бде́нию тщу, и не оста́ви словесе́ духо́вна, я́ко Госпо́дь воззри́т на ду́шу, и изведе́т тебе́ от вся́каго зла. Сон мног умножа́ет по́мыслы, бде́ние же бла́го истни́т я́. Сон мног наво́дит печа́ли, бдяй же избежи́т сих. Помина́й при́сно твой исхо́д, и не забыва́й суда ве́чнаго, и не бу́дет прегреше́ния в души́ твое́й. Покая́нием испра́виши ду́шу, ми́лостынею же и кро́тостию утверди́ ю́, а́ще и дух тщи́вства на́йдет на тя, до́му же твоего́ не оста́ви и не уклони́ся во вре́мя па́ки поле́зно. Я́коже бо кто чи́стит сребро́, та́ко исчи́стится се́рдце твое́. Дух смуще́ния отъи́мет сле́зы. Дух же печа́ли, сотре́т моли́твы. Я́коже зла́то и сребро́ искуше́но огне́м, та́ко и се́рдце мона́ха напа́стьми. Отъими́ от тебе́ велича́ние, и тщесла́вие дале́че сотвори́. И́же бо ны́не не хо́щет сла́вы, в бу́дущем ве́це возвели́чится, о Христе́ Иису́се Го́споде на́шем: Ему́же сла́ва, ны́не и при́сно, и во ве́ки веко́в. Ами́нь.