Ди́вна есть по́весть сия́ вся́кому послу́шающему, и вся́каго у́бо бла́га испо́лнена есть, и веду́ща нас ко спасе́нию. Сла́дость бо са́хара и семида́льнаго хле́ба, ничто́же есть: жела́ние же боголюби́вых книг и послуша́ние, па́че ме́да и со́та, веду́щее в Ца́рство, е́же Госпо́дь обеща́ боя́щымся Его. Сия́ же по́весть вельми́ ди́вна и чу́дна и пресла́вна, ю́же не леню́ся глаго́лати на по́льзу слы́шащым. Я́коже слы́шах в писа́ниих рече́нное: Буди́те спя́щыя, воздви́гните дре́млющыя, и понудите лени́выя, и со стра́хом вси послу́шайте, и ра́зумом внемлите глаго́лемая: Бра́та два бе́ста име́юща де́ти мно́ги, и вся ра́вно уча́ста я́, и страда́ти веля́ста без ле́ности: и по вся дни ну́ждаста я́ страда́ти, и ни еди́наго же дне пра́здна не даду́ща ходи́ти, но рано убужда́ста я́ на де́ло, и па́ки по́зде лещи́, то́кмо ма́ло сна до куроглаше́ния приима́ху, и па́ки земно́й страде́ прилежа́ще, и та́ко испо́лнишся гу́мна их пшени́цы и вина́. Еди́н же брат ею́ созва́в обою́ де́ти, рече́ им: Брат мой зол есть, и не пове́сть вам день, во́ньже то́кмо страда́вше обогати́тися. И николи́же страдати. Мы бо страда́вше по вся дни, и ничто́же успе́хом. Уве́давше же день той, страда́хом вонь, и мно́га бла́га испо́лнихомся: и ны́не вопроша́йте отца́ ва́шего, моего́ же бра́та, да вы пове́сть, аз бо забы́л есмь. Они́ же от ра́дости теко́ша ско́ро вопроша́ти отца́ своего́, да бы не страда́ти николи́же. Реко́ша же прише́дше ко отцу́: О́тче, что та́ко утомил ны еси́ не пове́да нам дне, во́ньже мы страда́вше, и мно́га блага испо́лнени бы́хом, и неску́дне приима́ют от ва́ю до́му? Рече́ же им оте́ц: Но ни аз ча́да по́мню дне того́, но послу́шайте мене, и блага́я земли́ сне́сте, иди́те и стражи́те с прилежа́нием год до го́да: егда́ же обря́щете день той, прииди́те ко мне в год. Они́ же страда́ша с ра́достию ле́то все, и приидо́ша я́коже им оте́ц повеле. И рече́ им оте́ц: Обрето́сте ли день той? они́ же ре́ша: Не обрето́хом. Дав же им проти́ву труда́ мзду. И отпусти́ я́ рек: Разложи́те ле́то на четы́ре вре́мени: ве́сну, е́сень, зи́му, ле́то: и кото́раго вре́мене страду́ замы́слите, да в не́мже вы вре́мени пребу́дете, в том вы день той. Они же страда́вше, приидо́ша в год и ре́ша: О́тче, мно́го настрада́хом, и дне не обрето́хом. Оте́ц же рече́ им: То бла́гу у́бо во́змете проти́ву труда́ мзду: но и еще́ послу́шайте мене́: Есть в ле́те, двана́десять ме́сяц, и на ки́йждо ме́сяц стражи́те, зна́менавше, и в не́мже вы ме́сяце прибу́дет, в том вам день той. Они́ же сотвори́ша я́коже повеле́ им, и с прилежа́нием страда́ша, но дне не обрето́ша. Никто́же бо весть дне сме́рти. И приидо́ша ко отцу́ и ре́ша: Что у́бо та́ко о́тче истоми́л ны еси́? Уже́ не хо́щем страда́ти, зане́ умно́жися житие́ на́ше, гу́мна, и точи́ла, и ско́ти, и ко́ни, и су́щым по нас досы́ти. Рече́ же им оте́ц их: Ча́да, мне́сте ли мно́го настрада́вше, еди́ною пожа́р во́змет, или́ вода́, или́ тать: та́коже и враг диа́вол, в ле́ности живу́щих погубля́ет. Но ищи́те того́ дне и часа́ в кий у́бо день ни тать подкопа́ет, ни огнь пожже́т, ни вода́ потопи́т, а́ще обря́щет вы гото́вы со Христо́м. Но и еще́ еди́ною реку́ вам: Есть в ле́те дний три́сте, шестьдеся́ть и пять. А часо́в, по двана́десять, во дни, та́коже и в нощи́. Да иди́те страда́ти, на ки́йждо день час. Я́ко бо о́ко мгнет, та́ко душа́ вы́ступит.

Послужи́те же ми, и послуша́йте мене́, да скажу́ вам уче́ния (толкова́ние) сея́ при́тчи. Бра́та два, Васи́лий Вели́кий, И Ефре́м преподо́бный име́юща де́ти мно́ги. Васи́лий в ми́ре насе́явый уче́нием всю вселе́нную: Ефре́м же в пусты́ни воспита́вый ча́да мно́га, слезам́и и посто́м. Уча́ста же де́ти мно́ги, ов в ми́ре, ов же в пусты́ни. Уча́ста же твори́ти до́брая дела́, моли́тве, посту́, воздержа́нию, кро́тости, смире́нию, ми́лостыни, та бо нетру́дно в Ца́рство небе́сное вво́дят. И не бы́ти пра́здным, но де́лати вы́ну, и́же кто ремество́ уме́ет: на лени́выя бо диа́вол вооружа́ется. Пребыва́ти же в чистоте́, и в год свята́го Воскресе́ния прият́и свято́е Прича́стие: то есть бога́тство неистощи́мое: то есть проти́ву труда́ мзду прия́ти: то у́бо да́рове нетле́ннии: и всего́ ми́ра честне́е есть Те́ло и Кровь Сы́на Бо́жия: и́же приима́ющии ве́рою спаса́ются. Ле́то есть Це́рковь, в не́йже апо́стольская за́поведь, и оте́ческая уче́ния, и проро́ческая рече́ния, страстоте́рпческая муче́ния, сла́ждша са́хара и семида́ла: к не́йже приходя́щым по вся часы́ помина́ти смерть, пла́катися грехо́в свои́х. В ме́сяцы же, и дни, и часы́, ра́зныя сме́рти от Бо́га посыла́еми человеќом. Или́ в воде́ утону́ти, ту смерть: или́ с коня́ свали́вся, или́ и́дя повали́вся у́мрет: или́ ку́сом пода́вится, или́ водо́ю захлене́тся, или́ от пития́ вели́ка, то вси часы́. Того́ ра́ди и на ле́то, и на ме́сяцы, и неде́ли, и на дни, и на часы́ стрещи́ся дне того́ сме́ртнаго, и часа́ того́, во́ньже душа́ разлучи́тся. Я́коже глаго́лет: В не́мже заста́ну, в том и сужду́. А́ще бо заста́нет смерть во благи́х де́лех, я́коже рех, в покая́нии, и в слеза́х, то а́ки не умре́ти, но пресели́тися от о́наго жития во благо́е. Того́ ра́ди послу́шавше при́тчи сея́, по вся часы́ помина́юще смерть, трудолю́бно поживе́м. Зде у́бо в ма́ле ве́це потруди́тися, а во ве́ки ра́доватися.