Ча́дца послу́шайте моего́ наказа́ния и бу́дите ми́лостиви. Огнь бо паля́щь погаси́т вода́, а ми́лостыня очи́стит грехи́. Не отвраща́йте о́чию от ску́дна и ни́ща, и ду́шы а́лчных не оскорбля́йте. Не мину́йте не да́вше прося́щему. Пи́сано бо есть: Избавле́ние му́жу души́ свое́ ему́ бога́тство. И па́ки: Ми́луяй поми́лован бу́дет. Му́жа бо ми́лостива лю́бит Госпо́дь. Те́мже при́зрите убо́гаго, добро́ твори́те не́мощному, и обря́щете отда́ние не от того́, но от Вы́шняго. Ми́лостыня бо му́жу, а́ки печа́ть с ним. Творя́й бо ми́лостыню, взае́м дае́т Бо́гу, и Той изба́вит его́ от вся́каго зла, и проти́ву враго́м ста́нет борю́щым его́. Весть бо Госпо́дь доброчести́выя от напа́сти избавля́ти, непра́ведныя же в день су́дный му́чимы блюсти́. Сокруши́т Госпо́дь чре́сла нечести́вых, и не бу́дет добра не даю́щему хле́ба прося́щым. Глаго́лет бо Влады́ка Христо́с: Блаже́ни ми́лостивии, я́ко ти́и поми́ловани бу́дут. Суд бо безми́лостивен несотво́ршым ми́лости.