Стихи́:

Окружи́ша еди́н, други́й и тре́тий Твой престо́л,

Вы́шний: Фавст, и Исаа́кий, и Далма́т:

Далма́т и Исаа́кий у́мре в тре́тий, та́кожде и Фавст.*

Сей святы́й Далма́т, бяше ходя́ во вторе́м упражне́нии при Феодо́сии царе́, живы́й благоче́стно и богоуго́дно. И Христа́ ра́ди оста́вив жену́ и ча́да, то́чию сы́на своего́ Фа́вста пое́м с собо́ю, прии́де к преподо́бному Исаа́кию, бы́вшему в по́стничестем житии́. К высоте́ доброде́тельней я́влься ве́лий. Ди́вный же сей Исаа́кий, от свои́х пеле́н в пусты́ню всели́ся, вся́кия ве́щи доброде́тельныя проходя́: Тем и сло́во его́ све́тло бя́ше, и житии́ красу́я. Исходя́щу же ца́рю Уале́нту на болга́ры на брань, усре́т его́ преподо́бный рече́: Отве́рзи о царю́ правосла́вным це́ркви, и соодоле́еши. Он же не повину́ся, но на я́рость себе подви́г, внегда́ возвращу́ся рече́, возда́м тебе́ о сих. Рече́ же преподо́бный: А́ще возврати́шися, несть во мне Го́спода Бо́га: Срази́шися бо в бра́ни, и побе́гнеши пред свои́ми враги́, и жив огне́м сгори́ши, е́же и бысть. Бежа́ бо от свои́х враг, и всели́ся в плевни́цу, и о́крест плевни́цу запали́вше, сгоре́ весма́. Внегда́ же восхоте́ от жития́ отъити́ блаже́нный сей, преподо́бнаго Далма́та игу́меном в себе́ ме́сто поста́ви. А́ттику тогда́ в Константи́не гра́де патриа́ршествующу. И той пе́рвее просия́ в по́стничестве, четы́редесять дний а́лчен пребы́сть. Царю́ же и сигкли́ту всему́, во Ефе́се соше́дшымся и отце́м, на злочести́выя еретики́, наро́чит я́влься и́же и архимандри́та того́ поста́вльше, и е́же в его́ оби́тели су́щии па́стыря нареко́ша, да́же и до ве́ка бы́ти. О Христе́ же у́спе, и положе́н бысть в свое́м монастыри́.

P.S. Стихи́ по гре́ческому оригина́лу. Славя́нский оригина́л стихо́в: Окрочи́ша Вы́шний, трие́ му́жие Твой престо́л: Фавст, и Исаа́кие, и Далма́т: Далма́та Исаа́кия, Фавст ви́де в тре́тий.

Сей бысть мних в ла́вре Фа́ре пода́ле Иерусали́ма, муж мудр зело́ и кре́пок по́стник, я́ко в чет́ыредесять дней еди́ну то́кмо изъяда́ше просфи́ру, а ино́го ничто́же вкуша́ше. Име́яше же хи́трость боже́ственых книг нема́лу. Иды́й же еди́ною потре́бы ра́ди во Иерусали́м, и ма́ло поболе́в у́мре. И повеле́ патриа́рх честны́я мо́щи его́ во свое́м монастыри́ положи́ти, иде́же епи́скоп лежа́ше. Во еди́н же от дней презви́тер Васи́лий све́дый доброде́тель ста́рца, идо́х рече́, да бых целова́л гроб его́. Бе же гро́ба верху́ разсла́блен лежа́ убо́гий прося́ше ми́лостыни от входя́щих в це́рковь, и той я́ко узре́ мя покло́ньшася три́жды, и сотво́рша моли́тву иере́йскую, и глаго́ла ми: «Вели́к есть о́тче ста́рец его́же погребо́сте зде пре́жде двою́ ме́сяцу». Аз же рех ему́: «А ты чим ве́си?» Он же рече́: «Господи́не а́вво, аз разсла́блен есмь лет двана́десять, и его́ ра́ди исцели́ мя Бог. И егда́ в ско́рби и в беда́х пребываху, и прихожда́ше и утеша́ше мя, и поко́й подава́ше ми. Но и се и́маши слы́шати пресла́вно о нем. Отне́леже погребо́сте, и до днесь слы́шу по вся но́щи глаго́люща и́ ко епи́скопу: «Не прикосни́ся ни прибли́жися мне ерети́че, враг бо еси́ собо́рней и апо́стольстей Це́ркви святе́й»». И се слы́шав аз у исцеле́вшаго, идох и вся испове́дах патриа́рху, и моли́х его́, да во́змет те́ло ста́рцево, и во ино́м гро́бе положи́т и́. И глаго́ла ми Григо́рий патриа́рх: «Ве́ру ими́ ми ча́до, ничи́м же врежа́ется от еретика а́вва Косма́. Но и се бысть, да ве́ра и ре́вность свята́го ве́дома да бу́дет нам. Та́кожде и сла́ва епи́скопа да обличи́тся, да не мним его́ правосло́вивша».

Во гра́де у́бо не́коем бе́ста два чернори́зца, и идо́ста на слу́жбу, и я́ко минова́ше еди́н ею́ ме́сто, и возва́ еди́наго блудни́ца не́кая глаго́лющи: «Спаси́ мя о́тче я́ко Христо́с блудни́цу», он же челове́ческаго студа́ небре́г отню́д, глаго́ла ей: «Гряди́ в след мене́». И ем за ру́ку ея́, и изы́де сквозе́ наро́д из гра́да всем ви́дящим. Бысть же прослы́тие, я́ко чернори́зец поя́т жену́ Порфи́рию, та́ко бо зва́ху ю́. Иду́щима же и́ма, да ю́ впусти́т в монасты́рь, и обре́те жена́ у еди́ныя це́ркве отроча́ пове́ржено, и взят его́ да вско́рмит. По ле́те же еди́ном приидо́ша в зе́млю е́тери, иде́же бе блудни́́ца, и ви́девше ю́ иму́щу де́тище, и глаго́лаша ей: «До́бре черни́це черни́чищь родила́ еси́». Ше́дше же в Тир ви́девшии ю́, отту́ду бо поя́л ю́ бя́ше черне́ц, и пове́даша та́мо я́ко родила́ есть жена́ Порфи́рия от ста́рца, и мы ви́дехом отроча́ очи́ма свои́ма подо́бно ему́. Егда́ же уве́да чернори́зец от Бо́га смерть свою́, и глаго́ла чернори́зице Пелаги́и, та́ко бо проименова́ ю́, егда́ даде́ ей о́браз святы́й: «По́йдема в Тир, я́ко ору́дие ми та́мо есть, хощу́ да и́деши со мно́ю». Она́ же не мо́же ся его́ отпре́ти, и́де во след его́. И приидо́ста иму́ща отроча́ седми́ лет су́що. И я́ко разболе́ся чернори́зец боле́знию сме́ртною, и взыдо́ша на посеще́ние его из гра́да сто челове́к. И глаго́ла: «Принесе́те огнь». И я́ко принесо́ша кади́льницу, и взем у́глие горя́щее ста́рец, и всы́па в стиха́рь свой, и рече́: «Изве́сто вы бу́ди бра́тие, зане́ я́коже Бог сохрани́в купину́ огне́м неопали́му, и я́коже и стихарю́ моему́ не прикосну́шася у́глия сия́, та́ко и аз не позна́х греха́ же́нска отне́леже рожде́н есмь». И вси диви́шася я́ко не сгоре́ стиха́рь его́ от огня́, и просла́виша Бо́га иму́щаго та́йныя рабы́. От вины́ же ма́тере Пелаги́и бы́вшия иногда́ блудни́цы мно́зи ше́дше по ней отре́кшеся ми́ра, и ше́дше в монасты́рь и постриго́шася. Сего́ ра́ди рече́но бысть вам, о́ ча́да, не бу́дите гото́ви на осужде́ние и охуле́ние чужди́х грехо́в. Мн́ожицею бо блудника́ согреша́юща ви́дехом, покая́ния же творя́ща не ви́дехом. Или́ кра́дуща не́коего ви́дехом, а воздыха́ния и слез я́же принесе́ Го́сподеви, не све́мы, я́ко от Бо́га прия́т бысть в та́йне покая́нии его́ и испове́дании. И вси дивля́хуся о уче́нии де́тельнаго пастуха́ и учи́теля.

Ча́дца послу́шайте моего́ наказа́ния и бу́дите ми́лостиви. Огнь бо паля́щь погаси́т вода́, а ми́лостыня очи́стит грехи́. Не отвраща́йте о́чию от ску́дна и ни́ща, и ду́шы а́лчных не оскорбля́йте. Не мину́йте не да́вше прося́щему. Пи́сано бо есть: Избавле́ние му́жу души́ свое́ ему́ бога́тство. И па́ки: Ми́луяй поми́лован бу́дет. Му́жа бо ми́лостива лю́бит Госпо́дь. Те́мже при́зрите убо́гаго, добро́ твори́те не́мощному, и обря́щете отда́ние не от того́, но от Вы́шняго. Ми́лостыня бо му́жу, а́ки печа́ть с ним. Творя́й бо ми́лостыню, взае́м дае́т Бо́гу, и Той изба́вит его́ от вся́каго зла, и проти́ву враго́м ста́нет борю́щым его́. Весть бо Госпо́дь доброчести́выя от напа́сти избавля́ти, непра́ведныя же в день су́дный му́чимы блюсти́. Сокруши́т Госпо́дь чре́сла нечести́вых, и не бу́дет добра не даю́щему хле́ба прося́щым. Глаго́лет бо Влады́ка Христо́с: Блаже́ни ми́лостивии, я́ко ти́и поми́ловани бу́дут. Суд бо безми́лостивен несотво́ршым ми́лости.