Сей преподо́бный нарица́шеся от Кри́тскаго о́строва, сро́дника же своего́ Фео́дора восхоте́ ви́дети, до́йде в Константи́нь град, и того́ приобщи́вшася бра́тии студи́йстей обре́т: и прия́т на ся мона́шеское житие́, и вся́кое наказа́ние прошед, и мона́шескаго жития́ зна́мения испы́тнейше изве́дев. И поста́влен бысть презви́тер, и бя́ше дости́гл в изя́щную прему́дрости доброде́тель. Что же по сем? Во изгна́ние с Фео́дором оби́тели настоя́щаго, божественный Никола́й осужде́н бысть. И от та́мо при́званы бывше, волу́ями жи́лами бие́ни бы́ша, Львом звероимени́тым христоненави́стником, я́ко покло́нницы боже́ственных ико́н су́ще. Та́же в темни́цу всажде́ны, и па́ки вопроше́ни, и бие́ни бы́ша: и три ле́та в темни́це претерпе́ша, гла́дом, и жа́ждею, и нагото́ю страда́ша. И в Сми́рну по́слани быша, и та́мо бие́ни, и в темни́цу вве́ржени бы́ша, и но́зе их в кла́де заби́ша. И два́десятим ме́сяцем мимоше́дшым, сконча́ житие́ Лев, и та́мошнему суду́ по́слан бысть. Тогда́ блаже́ннии Христо́вы испове́дницы изведе́ни бы́ша, и в Халкидо́н достиго́ша: и пресла́внаго патриа́рха Ники́фора целова́вше, пребыва́ху ку́пно. И пома́ле Михаи́лу ке́сарю повеле́вшу, в пру́сы прогна́ни бы́ша: та́же во Акри́т, иде́же многострада́льный Фео́дор, и ко Го́споду отъи́де. И пото́м Фео́филу иконобо́рцу ца́рство прии́мшу, па́ки на благочести́выя рать ве́лию подви́же. И тому́ Фео́филу житие́ сво́е зле скончавшу. И по нем прии́м ца́рство сын его́ Михаи́л, и благочести́вая ма́ти его́ цари́ца Феодо́ра, и смире́нию тве́рду бы́вшу. И по сих Вас́илий и́же от Македо́нии, ца́рство прия́т: преподо́бнаго сего́ и многострада́льнаго Никола́я, мно́гими мольба́ми и уте́хами увеща́в, игу́мена тоѓо в Студи́и поста́ви. И мно́ги у́бо вели́кий по́двиги подъя́т, и от мно́ги страдьбы́ изнемо́г: се́дмьдесять, и пять лет соверши́в, и с ми́ром почи́.