Алвиа́н боже́ственный священному́ченик, бе при Максимиа́не царе́, облада́ющу А́сиею Елиа́ну. Агрипи́ну же не́коему жерцу́ су́щу и́дольскому тре́бы творя́щу и́долом, тогда́ ят бысть Алвиа́н, и ну́димь пожре́ти и́долом, и лива́н положи́ти на тре́бищи. Он же проти́ву благочести́выми отвеща́ словесы́, Христо́ву у́бо ве́ру хвалю́, а и́дольскую слу́жбу укаря́ю. Того́ ра́ди пе́рвее у́бо рожны́ желе́зными чре́во и ля́двия его́ поджго́ша. Посе́м же́злием бие́н бысть неща́дно, и та́ко пону́жден бысть отврещи́ся Христа́ и пожре́ти и́долом, и не повину́ся со ученико́м свои́м. И последи́ огне́м осуже́ние прия́т. Разже́не же бы́вши пещи́, и с тем вве́ржен в ню сконча́ся.