Сей бя́ше в ле́та вели́каго Константи́на и пе́рваго царя́ христиа́нскаго, сын быв Доме́тиев. Доме́тий же бя́ше брат Про́ва царя, и́же роди́ два сы́на, Про́ва и Митрофа́на. Той мы́слию целому́дреною и́дольскаго служе́ния отве́ржеся, разсмотри́в бо я́ко преле́стно есть и ло́жно, и прии́де к ве́ре Христо́ве. И прише́д в Византи́ю, и пребы́сть у архиепи́скопа Византи́йскаго, му́жа до́блествена и богому́дрена, и́же того́ приведе́ в церко́вный при́чет. По сконча́нии же еп́ископа поста́влен быв Доме́тий первоседе́льник: и того́ восприя́т сын его́ Пров, и́же содержа́в це́рковь три ле́та, и отъи́де ко Го́споду. И а́бие Митрофа́н брат Про́вов, а Доме́тиев сын, на архиере́йский возведе́н бысть престо́л. Его́же обре́т вели́кий Константи́н в Византи́и епи́скопа, и добродетели его и нра́ву пра́вому поразуме́в подиви́ся, и нема́ла о нем бесе́довав приведе́ в Рим. Византи́ю же поставле́ния ра́ди гра́да, боголюбе́зна к подо́бию иму́ща разсмотри́в царь, и плода́ неоскуде́ние. К тому́ же мо́рем и сухото́ю подо́бна, и ку́пно приседя́ща обои́х вселе́ниих сече́нием, Евро́пии же и Аси́и. Возлюби́в же селе́ние то, любоче́стне сложи́в о том, е́же ни о какове́й поги́бели бы́ти, воздви́гнути зда́нием град. О вся́ких челове́цех сбыва́ющь и соодолева́ющь во окроче́нии свое́м, в не́мже держа́ву и ца́рство учини́. Того́же Митрофа́на от стараго Ри́ма ту преведе́. Ники́йскому же пе́рвому собо́ру соше́дшуся, блаже́нный же Митрофа́н ста́ростию, и неду́гом изнемо́г. Ибо бя́ше уже́ во вре́мени погорби́вся, есте́ственей си́ле отпа́дши. Пе́рваго же во свяще́нницех Алекса́ндра му́жа че́стна посла́ в ме́сто себе́, его́же и насто́льника именова́. Прише́дшу же царе́ви с богоно́сными и честны́ми отцы́, и собо́ру разше́дшуся, открове́нием Бо́жиим Алекс́андра, и и́же с ним Павла наро́чита су́ща и Бо́гу угожда́юща, нарекова́ по себе́ на престо́л святи́тельства. Преста́влься же в поко́й блаже́нный к Бо́гу пре́йде. Соверша́ется же собо́р его́ во святе́й Вели́цей це́ркви, и в честне́м его́ хра́ме, су́щем близ свята́го му́ченика Ака́кия во Ептаска́лех, иде́же лежи́т свято́е и честно́е те́ло его́.