Проро́к глаго́лет: я́ко того́ ра́ди заключи́ся не́бо не попусти́ти на зе́млю дождя́, я́ко да не клену́тся челове́цы Бо́гом и святы́ми Его́, и друг дру́га да не го́нит до кля́твы. И́бо святу́ю Це́рковь неве́сту Христо́ву рото́ю скверня́т, приводя́ще Сы́на, закала́ют пред Ма́терию, и слу́хи же тоя́ Ма́тере ро́ждшия. И по ду́ху бра́та своего́ святы́м креще́нием, пию́т кровь заколе́ннаго Сы́на Ма́тере тоя́. Того́ ра́ди вся небе́сныя си́лы со стра́хом трепе́щут, зане́же Госпо́дь Бог не вели́т челове́ка догна́ти до кля́твы и роты́. Пои́стинне бо Спас наш Иису́с Христо́с рече́: «Челове́цы си́и рото́ю Мя чтут и зна́ют». Сего́ ра́ди с небесе́ сходя́щь серп о́гнен, Заха́рия проро́к ви́де иду́щь на зе́млю в долготу́ два́десять лако́ть, а в ширину́ де́сять лако́ть. И о сем моля́шеся Бо́гу, да прояви́т ему́. И прии́де к нему́ глас, глаго́ля: «Сей есть серп, гнев Бо́жий сходя́ на тех, и́же на́ криве клену́тся и ротя́тся, да пожже́т я́, и душа́ их огню́ негаси́мому преда́ст». Бо́гу на́шему сла́ва всегда́, ны́не и при́сно и во ве́ки веко́в.