Рече́ Госпо́дь поуча́я ны святы́м отцо́м Васи́лием. А́ще кто от ве́рных и боголю́бивых, от дья́воля уче́ния или́ от своего́ помы́слия или́ от велича́ва и го́рда ума́, впаде́ть в се́ти неприя́зьнены, ре́кше во гнев или́ во сва́ры, или́ в бой или́ во сва́ду, или́ во клевету́, или́ в каку́ю вражду́, та́же па́ки страх Бо́жий прии́м во уме́ се́рдца своего́, и умиле́нною и покори́вою кро́тостью и любо́вь святу́ю и в па́мять свята́го и блаже́ннаго смире́ния и прии́деть на смире́ние с вели́кою любо́вию пеща́ся ско́ро не лицеме́рно нельсти́во слы́ша проро́ка глаго́люща, в не́мже тя заста́ну в том ти сужу́, и́ниде, со́лнце да не за́йдет во гне́ве ва́шем, и Дави́д рече́ гне́вайтеся не согреша́йте, и на ло́жех ва́ших умили́теся, и па́ки, же́ртва Бо́гу дух сокруше́н. Се́рдца сокруше́нна и смире́нна Бог не уничижи́т. И па́ки, близ Госпо́дь кро́тких се́рдьцем и смире́нныя душе́ю спасе́ть. И сам Госпо́дь рече́, мир Мой даю́ вам и мир оставля́ю вам. И Па́вел рече́, бу́ди мир и любы́ Бо́га и Отца́ и прича́сьтие Свята́го Ду́ха со все́ми ва́ми, и па́ки Госпо́дь рече́, о сем позна́ют вы вси я́ко Мои́ ученицы́ есте́. А́ще лю́бите враги́ ва́ша, и добро́ творите́ ненави́дящим вас, и молите́ся за творя́щая вам па́кости, и а́ки рече́ Госпо́дь блаже́не ми́лостиви я́ко ти поми́ловани бу́дуть. Блаже́не кро́тцыи я́ко ти насле́дят зе́млю. Блаже́не смире́ющеи, я́ко ти сы́нове Бо́же нареку́ться о Христе́ Иису́се.