Стихи́:

Гроб и тебе́, всеблаже́нный Келести́не,

Ли́ку совокупи́ся всеблаже́нному.

Сей бя́ше при Феодо́сии ю́ннем, в це́ркви ста́раго Ри́ма, житие́м и сло́вом до́бре соверше́н. Того́ ра́ди и архиерей́скму сподо́бися первопресто́лию, Зоси́ме па́пе от жития́ отше́дшу, и́же и блаже́нному Вонифа́тию вели́каго восприи́мшу Инноке́нтия. Келести́н же от апо́стольских преда́ний вся и глаго́ля, и творя́, низложи́ злочести́ваго Несто́рия еписто́лиями, богоме́рзския его́ хулы́ испове́дав. И́же и блаже́ннаго Кири́лла спосо́бника на изверже́ние его́ име́я. Мно́га же и ина исправле́ния слове́сная и па́мяти досто́йная соде́лав, с ми́ром от зде́шних изы́де. И к нестаре́ющему и блаже́нному преложи́ся животу́, с ли́ки апо́стольскими и оте́ческими веселя́ся.