Си́и бе́ша при Максимиа́не царе́, от села́ нарица́емаго Кандава́ль: и ту я́ти бы́ша, и стро́гани, до́ндеже ви́дети ко́сти их. Посе́м вве́ржени бы́ша в баню разжже́ну кре́пко, и назна́менану пе́рстнем царе́вым, я́ко да не изы́дут. А́нгел же Госпо́день воззва́ их извну́: и изыдо́ша без вре́да, и запеча́таным две́рем. Во́ини же е́мше их, и ведо́ша я́ из гра́да на пу́сто ме́сто: и просиша да́ти им час моли́твы, и посла́биша им во́ини. И ста́вше помоли́шася на мно́зе. И благодари́ша Бо́га, я́ко сподо́бишася по Христе́ му́чени бы́ти. И та́ко изсеко́ша их на у́ды. И го́лени их сокруши́ша. И вверго́ша их во огнь. И телеса́ их сгоре́ша, святы́я же ду́шы взыдо́ша на не́бо ра́дующеся.