По шестой песни:
И поется кондак и икос (или мученичен, аще несть).Стихи́:
Учи́тельства ти мзда от дете́й:
Вави́ло боже́ственый посе́чению общи́на:
О́троки и Вави́лу умори́ мечь в четве́ртый.
Той святы́й священному́ченик Вави́ла, бе патриа́рх вели́каго Антио́хия. При Нумериа́не Ри́мстем цари́. Тому́ же хотя́щу вни́ти в це́рковь и сре́те и́ святы́й в две́ре. И не дае́му в ц́ерковь Бо́жию вни́ти, зане́ бы́ти ему́ идолослужи́телю. Тем и нау́трия приведе́ его́ пред ся царь, и пону́ди его́ отврещи́ся Христа́, и не увеща́в его́, обличе́н бысть о и́дольстей ве́ре и кре́пко разгне́вався. Повеле́ на но́зе свята́го и на вы́ю возложи́ти вери́ги желе́зны и посреди́ гра́да влачи́ти. И рече́, руга́яся свято́му: «Та́ко ми бо́зи Вави́ло, подоба́ет ти вре́мя се зле страда́ти». Он же рече́: «Тако ми есть царю́ не я́коже тебе́ вене́ц». И се слы́шав осуди́ и́ на смерть и науче́ныя им младе́нцы. И пои́мше во́ини усе́кнуша и́ с младе́нцы. И та́ко погребе́н бысть нося́ вери́ги.
В то́йже день па́мять свята́го проро́ка Моисе́я
Стихи́:
Не из ка́мене ны́не,
Ниже́ за́днюю страну́ Моисе́й ве́диши,
Но весма́ Бо́га зри́ши.
Сей роди́ся во Еги́пте, пое́мши того́ царе́ва дщи, и сотвори́ его́ в сы́на себе, и вся́кою му́дростию наказа́вши. То́йже во́зрастом дости́г, и быв четы́редесятих лет, уби́ му́жа еги́птянина, бию́ща не́коего евре́янина. Тем убоя́вся, бежа́ в земли́ Мадиа́мскую, и та́мо пое́м жен́у Сепфо́ру, Иофо́рову дщерь. Яви́жеся ему́ Бог в купине пла́менне, и совершив четы́редесять лет. И повеле́нием Бо́жиим сни́де во Еги́пет к царю́ фарао́ну, да отпу́стит евре́йския лю́ди, е́же пожре́ти Бо́гу. Непокаря́ющужеся ему́, казни́т Еги́пет десятию́ я́звы. Те́мже словесе́м Бо́жиим, пое́м лю́ди с сребро́м и златом, и сквозе́ мо́ре прове́д, зна́меньми наказа́в. Зако́н получи́, и прекосло́вием Бо́га раздражи́. Взы́де же на го́ру повеле́нием Бо́жиим, и преста́вися. И погребе́н бысть в горе́ Авари́ме [1], архистрати́гом Бо́жиим Михаи́лом: сый лет ста и два́десяти. Предвари́в прише́ствие Христо́во, за ты́сящу лет, и четы́ре ста, и о́смьдесять и пять.
Сноски:
1 - В иных вариантах – «погребен бысть ангелом в неведомем месте»
В то́йже день святы́х му́ченик Фео́дора, и Миа́на, и Иулиа́на, и Кио́на
Си́и бе́ша при Максимиа́не царе́, от села́ нарица́емаго Кандава́ль: и ту я́ти бы́ша, и стро́гани, до́ндеже ви́дети ко́сти их. Посе́м вве́ржени бы́ша в баню разжже́ну кре́пко, и назна́менану пе́рстнем царе́вым, я́ко да не изы́дут. А́нгел же Госпо́день воззва́ их извну́: и изыдо́ша без вре́да, и запеча́таным две́рем. Во́ини же е́мше их, и ведо́ша я́ из гра́да на пу́сто ме́сто: и просиша да́ти им час моли́твы, и посла́биша им во́ини. И ста́вше помоли́шася на мно́зе. И благодари́ша Бо́га, я́ко сподо́бишася по Христе́ му́чени бы́ти. И та́ко изсеко́ша их на у́ды. И го́лени их сокруши́ша. И вверго́ша их во огнь. И телеса́ их сгоре́ша, святы́я же ду́шы взыдо́ша на не́бо ра́дующеся.
В то́йже день сло́во от Лимони́са его́же хоте́ уби́ти срачи́нин
Пове́даше не́кто срачи́нин нам глаго́ля, я́ко идо́х рече́ еди́н в го́ру отца́ Анто́ния да половлю́. Иду́щу же ми ви́дех мни́ха седя́ща и держа́ща кни́ги и чту́ща. Изъидо́х к нему́ хотя́ искуси́ти его́ и уби́ти. И я́коже приидо́х близ его́, и просте́р ру́ку свою́ десну́ю ко мне, реки́й: «Ста́ни». И сотвори́х два дни и две но́щи не моги́й отъити́ ника́може с ме́ста иде́же бех. И глаго́лах ему́: «Та́ко ти Бо́га Его́же чте́ши пусти́ мя». Он же рече́ ми: «Иди́ с ми́ром». И та́ко возмого́х отъити́ с ме́ста, иде́же бех стоя́.