Внемли́те себе́ изве́стно о глаго́лемых. Казни́те де́ти своя́ и́змлада. Глаго́лет бо прему́дрость, любя́й сы́на своего́, жезла́ на нем не щади́, казни́ его́ от ю́ности, да на ста́рость твою́ поко́ит тя. А́щели и́змлада не нака́жеши его́, то ожесточа́в не повине́т ти ся. Глаго́лет бо в четве́ртых ца́рствах си́це. Бысть не́кто свяще́нник во Иеросали́ме и́менем Илия́, смире́н и кро́ток, уго́дник Бо́жий на вся́ко де́ло бла́го. Сий же бе двою́ отроча́ту оте́ц. И водя́ ею́ на зло ше́ствующа, и не казня́ше их, ни возбраня́ше им ни уча́ше боя́тися Бо́га, и ка́зни не нанесе́ де́тем свои́м жезло́м, но во́лю им бя́ше вдал. Они́ же в бу́ести и в ненаказа́нии все зло́е творя́ста. И рече́ Бог Илии́ отцу́ их, поне́же не казни́л еси́ сы́на своя́ до́бре. Ны́не да у́мрета сы́на твоя́ мече́м. И ты сам, и весь дом твой поги́бнет сы́ну твое́ю де́ля, поне́же не наказа́л еси́ я до́бре боя́тися. А́ще бо и мно́го лет свяще́нствова во Изра́или, и богоуго́дно поживе́, но поне́же детми́ не печа́ловлся с прилежа́нием, того́ ра́ди зле поги́бе. Слы́шасте ли бра́тие словеса́ сия́, я́ко Илии́ та́ко сотвори́л Бог в ве́тсем зако́не, да что подъи́мем мы в но́вем су́ще зако́не, не уча́ще дете́й свои́х на добро́. О сем и Иоа́нн Златоу́стый глаго́лет. И́же дете́й свои́х целому́дрию не наказу́ет, той горе́е разбо́йник осу́дится. Разбо́йник бо те́ло сме́рти предае́т, а он ду́шу. Но вы бра́тие и ча́да люби́мая, учи́те де́ти своя́ и́змлада всему́ Бо́жию зако́ну и добру́ нра́ву, да страх Госпо́день прие́мше не опеча́лят вы на ста́рость ва́шу. А́щели не послу́шают тебе́ де́ти твои́, то не щади́ на них лозы́, я́коже прему́дрость Бо́жия глаго́лет. До шести́ ран, или́ до двуна́десяте ран да́си сы́ну. А́ще ли вели́ка вина́, и ты два́десят ран да́си. Бра́тие наказу́йте де́ти своя́ Бо́га боя́тися, а злых дел оста́тися, да не зле поги́бнете. Иере́и же наказу́йте де́ти своя́ духо́вныя, епитемия́ми свя́зывающе. А́щели зде вы не связу́ете, то ждут вас неразреши́мыя у́зы. Роди́мыя же де́ти своя́ учи́те наказу́юще не сло́вом то́чию, но и ра́нами, да не прии́мете за них ны́не от челове́к сра́ма, а в бу́дущий век муче́ния с ни́ми. Се же не еди́нем попо́м, но и всем христия́ном, да наказу́ют де́ти своя́ до́бре.