Да есте ве́дуще возлю́блении, я́ко вси нра́вы са́ми себе́ содержа́тся сою́зом любве́ духо́вныя. Се́рдце чи́сто от любве́ Бо́жия: Любо́вь от ра́дости: Ра́дость от кро́тости: Кро́тость от смире́ния: Умиле́ние от слу́жбы боя́знены: Слу́жба от Госпо́дня упова́ния: Упова́ние о пра́выя ве́ры и непоро́чныя: Ве́ра от послуша́ния: Послуша́ние от беззло́бия: Ко́рень же всем сим доброде́телем беззло́бие. Проти́вная же зла́я, от ни́хже есть поги́бель души́, и та́ко содержа́тся к себе́: Не́нависть от я́рости: Я́рость от неве́рствия: Неве́рство от жестосе́рдия: Жестосе́рдие от сла́бости: Сла́бость от чревоуго́дия: Объяде́ние от го́рдости: Ле́ность от нетерпе́ния: Нетерпе́ние от велер́ечия: и про́чыя зло́бы са́ми себе́ содержа́тся. Ко́рень же всем сим за́висть. Сих же всех ки́йждо нас свое́ю во́лею привязу́ется. Ра́зны суть поги́бели сия́, та́ко же ра́зны и доброде́тели. Да собере́м бра́тие себ́е доброде́тели, и бу́дет труд наш во благоуха́ние Бо́жие, и пресели́т ны в ве́чную жизнь.