Святы́й священному́ченик Патрики́й глаго́лет: Я́ко два ме́ста угото́ва Бог. Еди́но мно́гих благи́х, и́хже пра́веднии наслажда́ются: Друго́е же тмы и огня́, иде́же гре́шнии му́чатся. Я́ко не то́чию огнь на земли́ положи́л есть Бог, но и на небесе́х есть огнь и вода́, и на верху́ земли́ вода́ есть, я́же глаго́лется мо́ре: и ина́я же глаго́лется преиспо́дняя бе́здна: от нея́же а́ки исто́чницы точа́тся на живо́т наш, и от огня исхо́дят те́плыя воды́, о́вы убо паче: о́вы же ра́вно. А и́же под земл́ею вода́, и огнь, муче́ние есть душ гре́шных: я́коже преиспо́дняя ледяна́я вода́, та́ртар, иде́же е́ллинских бого́в му́чатся слуги́. Святы́й бо Пио́ний глаго́лет: Я́ко аз всю Иуде́ю проше́д, и преше́д Иорда́н, ви́дех зе́млю свиде́тельствующу гнев Божий и до сего́ дня на творя́щих грехи́. Ви́дех бо дым смра́ден исходя́щь, и огне́м пали́му и неприча́стну вс́якого плода́, и вся́каго вла́жнаго существа́. Се бо издале́ча ви́дев Сикили́йский те́мный куря́щься огнь. И се свиде́тельствуем вам, и о бу́дущем огни́ суда́ ра́ди быва́ющаго от Бо́га. Ви́дех же го́ру точа́щу стра́шный огнь я́ко во́ду три́ста са́жен вы́ше горы́, в длину́ же до шести́ по́прищь, и́же за шесть дней пожже́ зе́млю ту и ка́мение, до́ндеже Стефа́н преподо́бный епи́скоп со кресты́ шед помоли́ся Бо́гу, и преста́ огнь.