Прииди́те послу́шайте ча́да, и возлю́бленная моя́ бра́тия, в це́рковь Бо́жию прише́дше, да пове́м вам, я́ко с вели́ким блюде́нием и со стра́хом Бо́жиим послу́шаем в час пе́ния святы́я Литурги́и. И да не глаго́лем о жите́йских в це́ркви Бо́жией. Си́це бо и пред земны́м царе́м предстоя́т со стра́хом, да не от царя́ себе́ ви́ну обря́щут. И толи́ко тща́ние к земно́му царю́ творя́т, ели́ко пред ним не сме́ют брат на бра́та и возре́ти. А́щели возри́т, а́бие я́ростию царе́вою бие́н быва́ет. Коли́ко у́бо бра́тие моя́ возлю́бленная, предстоя́ще в це́ркви пред Бо́гом, ле́по у́бо никому́же по́вести де́яти друг со дру́гом, но то́кмо ум име́ти в пе́нии и в моли́тве. Да не преоби́ди в це́ркви молвя́ и смея́ся и дре́мля, и мня́ся не согреша́ти. Но слу́шай и внемли́, что глаго́леши усты́ и язы́ком свои́м, и вся́ку в то вре́мя отве́рзи печа́ль, я́ко Царя́ всех подъе́мля. Царь бо ца́рствующим. Да и́же хотя́ше спасе́ни бы́ти, то подоба́ет нам целому́дреным бы́ти в час моле́ния, а не тща́тися на пу́стошь прельща́ющеся от дия́вола, все́ми козньми́ и неразу́мием. Не поразуме́ем ли я́ко пра́вдою нано́сит Бог, и наво́дит гнев на нас согреша́ющих? Но и о́нех ра́ди и́же не запреща́ют по повеле́нию па́стуси, и непокори́вых и́же ненауче́ных от попо́в, и непослушли́вых, вели́к бо есть тем грех.
Ти́и бо глаго́лют: «Не уме́ем пе́ти». Почто́ не уме́ете пе́ти? Не разуме́ете ли глаго́лемых в це́ркви? Хо́щете ли да реку́ вам: Чесо́ ра́ди всегда́ в час служе́бный вне стоите́, игра́ете и смее́теся? Сего́ ра́ди не разуме́ете быва́ющих в це́ркви, егда́ диа́кону глаго́лющу: «Во́нмем». Да во́нмем глаго́лющая словеса́ от нас: «Ве́рую во Еди́наго Бо́га Отца́ Вседержи́теля, и во Еди́наго Го́спода Иису́са Христа́ Сы́на Бо́жия Единоро́днаго, И́же от Отца́ рожде́ннаго пре́жде всех век. И́мже вся бы́ша, на небеси́ и я́же на земли́, и е́же в бе́зднах. И в Свята́го Ду́ха и Животворя́щаго, глаго́лавшаго проро́ки. И во еди́ну святу́ю собо́рную и апо́стольскую Це́рковь». Что ра́ди свя́та? Я́ко Бог пребыва́ет в Ней. Что ра́ди соборна́я? Я́ко от всех язы́к ве́рующих, и креща́ющихся Це́рковь Бо́жия прие́млет. Сам бо Госпо́дь рече́: «Я́ко приходя́щих ко Мне не изжену́ вон».
И пото́м дия́кон глаго́лет: «Ста́нем до́бре». Не стоя́ние нога́м глаго́лет: ни внутрь и́на и вне по́мысл, ни ту стоя́ния, а вне помина́ние о скоте́ и о ни́вах и о виногра́дех, и нечи́стых помысло́х, и про́чее жития́ сего́ печа́ли. Ста́нем со стра́хом и́же со всем богоразу́мием предстоя́ти в це́ркви Бо́жией. Во́нмем свято́е возноше́ние, и е́же слу́шати от всего́ се́рдца своего́ глаго́лемая от иере́я, а не блазни́тися умо́м и́намо.
Дия́кону глаго́лющу: «Ми́ром Го́споду прино́сим». Мы же отвеща́ем: «Ми́лость, мир, же́ртва, и пе́ние». Ми́лость глаго́лет на ни́щых, ми́ловати и поко́ити их. Мир же со все́ми име́ти. Же́ртва и пе́ние, да прии́мет Бог же́ртву на предлежа́щей трапе́зе, за славосло́вие се́рдца твоего́.
Иере́ю глаго́лющу: «Горе́ име́ем сердца́». Обеща́ющымся нам и глаго́лющым: «И́мамы ко Го́споду». Тре́буем ми́лости Его́: поми́луем же в беда́х, а́лчущыя, и стра́нныя и наги́я, и и́же в боле́знех лежа́щыя, и в темни́цах су́щых. Вся бо сия́ свята́я слу́жба помина́ет, до́бре творя́щыя, и благоде́ющыя во святы́я це́рквах ми́лующыя ни́щыя.
Иере́й глаго́лет: «Побе́дную песнь принося́ще». Что ра́ди побе́дную? Да Бо́жиею благода́тию сохраня́еми, воздади́м трисвяту́ю песнь Бо́гу на́шему, моля́щеся Ему́ и ми́ли де́юще, да ми́лость к нам пока́жет, и спасе́т нас от вся́кого зла, и да изба́вит ны от всех грех, и поми́лует ны, я́ко Еди́н благ и Человеколю́бец. Ами́нь.