Елисе́й сла́вный проро́к бе от Авелму́ф, от земли́ Руви́мовы, сын Асафа́тов. И о сем сбы́сться зна́мение, зане́же внегда́ роди́ся в Галга́лех, злата́я ю́ница я́же бя́ше в Сило́ме, возгласи́ си́льне, я́ко слы́шатися во Иерусали́ме. Рече́ иере́й ра́ди зна́мения, я́ко «Проро́к роди́ся днесь во Иерусали́ме, и́же разруши́т истука́нныя, и сокруши́т си́льныя». Мно́га же зна́мения сотвори́ Бог руко́ю Елисе́я проро́ка. Сей проро́чествова о прише́ствии Госпо́дни. И иерихо́нския же исцели́ во́ды, я́же бя́ху го́рки и сла́ны, рек: «Та́ко глаго́лет Госпо́дь, исцеля́ю во́ды сия́», – и исцеле́ша. Но и ме́ртвыя воскреси́, и очи́сти от прока́зы Неема́на си́рскаго. И Гиези́ю своего́ слугу́, прокаже́на сотвори́ бы́ти за сребролю́бие его́ и преслуша́ние. И мертв сый, воздви́же ме́ртваго. И раздели́ иорда́нския струи́, уда́рив ми́лотию Илиино́ю. И и́на мно́га чудеса́ сотвори́в в сла́ву Бо́жию, от ни́хже еди́но се. Седя́щу ему́ близ Иорда́на с пятью́десять сыно́в проро́ческих, и слы́шав о нем царь Асири́йский, и посла́в поима́ти его́ ты́сящу во́ин. И узре́вше с горы́ во́и, и́же бя́ху со Елисе́ем му́жи хотя́ху бежа́ти. И рече́ Елисе́й: «Почто́ хо́щете бежа́ти? Ма́ло во́я их, у нас бо мно́жайшая [суть] во́я их», – и показа́ им а́нгельских вой мно́жество о себе́. И укрепи́в я, и́де с ни́ми ко аси́рьским лю́дем и рече́: «Кого́ и́щете?», и ре́ша: «Елисе́я». Глаго́ла: «Иди́те во след мене́», и, приве́д я в Самари́ю, глаго́ла царю́ Изра́илеву: «Не убива́й люде́й сих, и дав им я́сти, отпусти́ их. Не на тебя́ бо придо́ша, на меня́». И воспроси́ царь во́и их: «Ка́ко вы сме́сте вни́ти во град сий?», и те кленя́хуся и глаго́люще: «Ни гра́да ви́дехом, ни руку́ име́хом». Елисе́й же пожи́в Бо́гу уго́дно и преста́вися к Бо́гу, и погребе́н бысть в Самари́и, в Сева́сте гра́де.