Каце́х му́к не суть досто́йни глаго́лющи, я́ко несть муче́ния согреша́ющым, я́коже не́цыи неве́гласи веща́ша, человеколю́бец есть Бог, и не хо́щет му́чити согреша́ющих. Да а́ще у́бо не му́чит, то обря́щется тебе́ в тщету́ Человеколю́бец. Рцы же ми, не по достоя́нию ли прии́меши му́ку, а́ще согреша́я не пока́ешися. Что бо нам не сотвори́ Бог, да бы́хом за́поведи Его́ храни́ли и спасе́ни бы́ли. Не попрети́ ли, не тма́ми ли соде́я на́шего ра́ди спасе́ния чудеса́ и ка́зни. Да а́ще у́бо зли́и не му́чатся, и ка́ко рещи́ блази́и венча́ются. Рцы ми, не Ца́рствия ли ра́ди Небе́снаго труди́шася святи́и в ми́ре сем? То где есть правосу́дие Бо́жие. Но у́бо не льсти́те себе́ челове́цы послу́шающе дия́вола, того́ бо суть такови́и по́мыслы и глаго́лы.
Слы́шах рече́ не́кия грехолю́бцы глаго́люща, я́ко на страх челове́ком прети́т Бог му́кою, но не бу́ди то. А́ще и Человеколю́бец Бог сый, но му́чит согреша́ющих и па́че зна́ющих Его́. Рцы ми у́бо, и́же лже́ю Бо́га нарица́ющий, И́же согреша́ющих не му́чит: Кто всю вселе́нную при Но́и потопи́, и лю́тую беду́ наведе́ всему́ ро́ду на́шему? Кто ли ка́мение о́но горя́щее и пла́мень посла́ на содо́мскую зе́млю? Кто еги́птяны в мо́ри потопи́? Кто изра́ильтяны в пусты́ни препита́? Кто сонм Авиро́нь пожже́? Кто при Корре́и и Дафа́не зи́нути земли́ повеле́, и жи́вы пожре́ти сотвори́? Кто се́дмьдесят ты́сящ при Дави́де отъя́т? Кто сто и о́смьдесят и пять ты́сящ в еди́ну нощь при Иса́ии умори́? И ны́не по вся дни беды́ прие́млем согреша́юще. Ка́ко у́бо прие́млеши сло́во, о́вех му́чит, и о́вех не му́чит. И́бо а́ще есть не оби́длив Бог, то вся́ко и ты согреша́я в му́ку осуже́н бу́деши. Да а́ще Человеколю́бец есть Бог и не му́чит, сим подоба́ет му́читися, но оба́че сих ра́ди слове́с ве́руй, я́ко мно́ги зде му́чил Бог, та́кожде и та́мо му́чит го́рько. Да егда́ рече́нным ти не ве́руеши преще́нию, поне́ ве́щем ве́руй и муче́нию, я́ко Христо́с сам прети́т му́кою, а не ты бы име́л сие́ сло́во глаго́лати не бы́ти му́це.
Но потщи́теся испра́вити за́поведи, я́ко Бог согреша́ющыя му́чит, а пра́вдою живу́щыя венча́ет. Ему́же сла́ва, ны́не и при́сно и во ве́ки веко́в. [Ами́нь.]