Стихи́:

Вре́да па́губящаго угонзе́, Ти́хоне:

К жи́зни Ти́хоне быв непа́губней:

В шесты́й на́десять покры́ земля́ Ти́хона.

Сей благочести́ву и христолюби́ву роди́телю имя́ше, и́же и Бо́гу того́ возло́жьша, и свяще́нным кни́гам научи́вша. Пи́смена дово́льно навы́к, пе́рвее же прочита́ти лю́дем боже́ственая слове́са учини́ся. Та́же вся́кого ра́ди наро́чьства, и честна́го ра́ди жития́, Мни́мием святы́м епи́скопом амафу́нтским, поста́влен бысть диа́коном. О́ному же от жития́ отше́дшу, той на епи́скопский возведе́н бысть престо́л, вели́ким Епифа́нием. Обрати́в же мно́ги от и́дольския пре́лести и су́етства, к ве́ре Христа́ Бо́га на́шего. И мно́гия це́ркви ид́ольския разори́, и поруши́в и́же в них и́долы, ко Го́споду отъи́де. Чудоде́йства мно́гая, еще́ сый в животе́, творя́, та́же и по сме́рти. От ни́хже две чудеси́ пове́м, и́же на обое́ явле́ния доброде́тели му́жа изложи́ти досто́йно:

Се бо оте́ц его хле́бный бе пече́ц. И повеле́ ему́, еще́ ю́ну су́щу, продая́ти хле́бы, и́бо бя́ше ему́ от такова́го соде́лования житию́ име́ние, отцу́ его́ уже́ ощути́вшу и дряхлу́ющу. О́нже взем це́ну и дава́ше ни́щим. И се уве́дев оте́ц его́, и разгне́вася на него́. О́нже глаго́лаше ему́: «Не разгне́вайся о́тче, Бо́гу даю́ взаи́м и ха́ртию и́мам показа́ния, я́ко прия́ти и́мам от Него́ стори́цею». И сие́ рек, отъи́де со отце́м в жи́тницу, и обре́те ю́ по́лну пшени́цы. Хлебо́м бо изоби́льным обре́тшимся па́че, внегда́ подая́ние ни́щым творя́шеся. Толи́ко бо бя́ше изоби́лием кипя́, Бо́гу у́бо пшени́цу ме́ряющу и в жи́тницу к нему́ всыпа́ющу и́же и бысть явле́но во сла́ву Его́. И просла́ви Бо́га оте́ц его́.

Па́ки же де́лателем сухи́я ро́ждия уре́зающим, и вон из виногра́да измета́ющим, взем святы́й еди́ну от ро́ждий и насади́, и помоли́ся Бо́гу да́ти ему́ да́ры четы́ри: вла́гу жи́та (живота́), гобзова́нием плодо́м, гро́зну сла́дость, ра́нное прозябе́ние. Е́же и бысть, на у́трие дня, а́бие вкорени́вшися, и прозя́бши и созре́вши.

Тако́жде же и ны́не, па́мяти свята́го Ти́хона прише́дше, пре́жде вре́мене, в шестьна́десятый день ме́сяца ию́ния грезно́вию зеле́ну су́ще, о́ны еди́ны на блаже́нней Трапе́зе ви́дети есть начина́ющи зре́ти, посе́м сла́дким бы́ти и та́же изгнете́ным во свято́е Прича́стие, в Пречи́стую Кровь и Тело Го́спода на́шего Иису́с Христа́ прия́тыми бы́ти, на благодаре́ние Бо́гу, и на воспомина́ние свята́го.

Стихи́:

Купина́ тебе́, Ма́рко, ка́менная тягота́,

И ру́це я́ко и ра́ны низпусти́в до́лу.

Стихи́:

Купина́ тебе́, Ма́рко, ка́менная тягота́,

И ру́це я́ко и ра́ны низпусти́в до́лу.

Стихи́:

Рвет сострада́льцем пятосто́лпие вели́кое,

Тру́сом колеба́емь мече́м слу́жим.

Каце́х му́к не суть досто́йни глаго́лющи, я́ко несть муче́ния согреша́ющым, я́коже не́цыи неве́гласи веща́ша, человеколю́бец есть Бог, и не хо́щет му́чити согреша́ющих. Да а́ще у́бо не му́чит, то обря́щется тебе́ в тщету́ Человеколю́бец. Рцы же ми, не по достоя́нию ли прии́меши му́ку, а́ще согреша́я не пока́ешися. Что бо нам не сотвори́ Бог, да бы́хом за́поведи Его́ храни́ли и спасе́ни бы́ли. Не попрети́ ли, не тма́ми ли соде́я на́шего ра́ди спасе́ния чудеса́ и ка́зни. Да а́ще у́бо зли́и не му́чатся, и ка́ко рещи́ блази́и венча́ются. Рцы ми, не Ца́рствия ли ра́ди Небе́снаго труди́шася святи́и в ми́ре сем? То где есть правосу́дие Бо́жие. Но у́бо не льсти́те себе́ челове́цы послу́шающе дия́вола, того́ бо суть такови́и по́мыслы и глаго́лы.

Слы́шах рече́ не́кия грехолю́бцы глаго́люща, я́ко на страх челове́ком прети́т Бог му́кою, но не бу́ди то. А́ще и Человеколю́бец Бог сый, но му́чит согреша́ющих и па́че зна́ющих Его́. Рцы ми у́бо, и́же лже́ю Бо́га нарица́ющий, И́же согреша́ющих не му́чит: Кто всю вселе́нную при Но́и потопи́, и лю́тую беду́ наведе́ всему́ ро́ду на́шему? Кто ли ка́мение о́но горя́щее и пла́мень посла́ на содо́мскую зе́млю? Кто еги́птяны в мо́ри потопи́? Кто изра́ильтяны в пусты́ни препита́? Кто сонм Авиро́нь пожже́? Кто при Корре́и и Дафа́не зи́нути земли́ повеле́, и жи́вы пожре́ти сотвори́? Кто се́дмьдесят ты́сящ при Дави́де отъя́т? Кто сто и о́смьдесят и пять ты́сящ в еди́ну нощь при Иса́ии умори́? И ны́не по вся дни беды́ прие́млем согреша́юще. Ка́ко у́бо прие́млеши сло́во, о́вех му́чит, и о́вех не му́чит. И́бо а́ще есть не оби́длив Бог, то вся́ко и ты согреша́я в му́ку осуже́н бу́деши. Да а́ще Человеколю́бец есть Бог и не му́чит, сим подоба́ет му́читися, но оба́че сих ра́ди слове́с ве́руй, я́ко мно́ги зде му́чил Бог, та́кожде и та́мо му́чит го́рько. Да егда́ рече́нным ти не ве́руеши преще́нию, поне́ ве́щем ве́руй и муче́нию, я́ко Христо́с сам прети́т му́кою, а не ты бы име́л сие́ сло́во глаго́лати не бы́ти му́це.

Но потщи́теся испра́вити за́поведи, я́ко Бог согреша́ющыя му́чит, а пра́вдою живу́щыя венча́ет. Ему́же сла́ва, ны́не и при́сно и во ве́ки веко́в. [Ами́нь.]

Сей у́бо преподо́бный оте́ц наш Ти́хон бя́ше ро́дом от Ма́лыя Росси́и, от Лито́вских преде́л: чи́ном во́ин бя́ше. Не терпя́ же лати́нскаго наси́лия, пресели́ся в ца́рствующий град Москву́, и богоуго́дно живя́ше. И коне́чнаго ра́ди смире́ния своего́, раздаде́ име́ние свое́ ни́щым, и постриже́ся во и́ноческий о́браз. И всели́ся на реце́ Лу́ху, и воздви́же пусты́ню, и учени́к собра́ нема́ло. И богоуго́дно подвиза́ся в посте́ и в воздержа́нии, и коне́чнаго ра́ди смире́ния, не восприи́м свяще́нства и до исхо́да души́ своея́. Проуве́дев же свое́ к Бо́гу отше́ствие, и поучи́в ученико́в свои́х о по́льзе душе́вней, преста́вися к ве́чным оби́телем. По преставле́нии же его́ мно́га ле́та преидо́ша, и обре́тены бы́ша мо́щи его́. И мно́гая от них исцеле́ния быва́ют. И от ве́рующих обит́ель пречестна́ возгради́ся, я́же и до ны́не стои́т, благода́тию Бо́жиею.

Помы́слите бра́тия и устраши́теся челове́цы ка́ко стра́шный отве́т хо́щете прия́ти, во о́ном ве́це в день Суда́ стра́шнаго. И вста́нем умеле́ни? дря́хлии, и злы́ми свои́ми де́лы и осуже́ни бу́дем е́же сотвори́хом в житие́ сем. Его́же не подоба́еть хрестья́ном сех злых дел твори́ти. Е́же отреко́хомся во святе́м креще́нии, реку́ще отрека́емся сатаны́ и всех дел его́, то есть благн(с) челове́к пред Бо́гом и пред а́нгелы Бо́жии. И́же вся зла́я неподо́бная от себя́ отри́нем, и твори́м до́брая де́ла. И поживе́м в стра́се Бо́жии во кро́тости и во́лю Бо́жию твори́м. О бра́тья вси пла́чем о себе́. И потщи́мся и воздохне́м о себе́. И ма́ло ве́рнаго челове́ка уве́рим. О го́ре не послу́шающим уче́ния Госпо́дня и святы́х апо́стол. И преподо́бных оте́ц наказа́ния. О го́ре нам входя́щим в це́рковь Госпо́дню, и не име́ющи стра́ха Бо́жия и боя́зни. И еще́ велича́ються пред челове́ки, и мы́сляще о суете́ ве́ка сего́ тле́ннаго, а стра́ха Бо́жия не име́ють и Бо́га не сла́вят. О го́ре преступа́ющих за́поведи отца́ своего́ духо́внаго. А поручи́вся Бо́гу до́брая де́ла твори́ти; О го́ре не послу́шавше отца́ своего́ и ма́тери. О го́ре с бра́тиею и со дру́зи ненави́дящися. О го́ре воскресе́ния Госпо́дня не честву́ющим ра́но яду́щи и пию́щи. И блуд творя́ще. О го́ре заведли́ву, и не послушли́ву, клеветнику́, та́тю, я́ко те причсте́ныи суть со прелюбоде́и в му́ку ве́чную. О го́ре челове́ку тому́ и́же от своея́ жены́ блуд твори́ть. О го́ре даю́щему зла́то и сребро́ в ли́хву, и по наси́лью ре́зы(и) е́млюще, а не по пра́вде. То есть сатане́ часть. Го́ре блуднику́, и́же во мно́гыя блуды́ впа́даеть, или́ с черни́цею, или́ с тродни́цею, или́ с кумо́ю, или́ с мужа́тицею жено́ю. О го́ре мздои́мцу и оби́дяще по наси́лью вся́кого челове́ка. О го́ре челове́ку тому́ и́же зло име́я на дру́га своего́. И не прости́вся с ним и у́мрет. О го́ре тому́ и́же кто во це́ркви по́вести твори́ть, а не со стра́хом стои́т, а пе́ния свята́го не слу́шает. И Бо́га не сла́вит и по́йдет во святу́ю це́рковь, а не прости́вся и покло́нится Богу. Несть ему́ по́лзы в моле́нии его́. О го́ре челове́ку, велича́ву и хупа́ву и понужа́ющии на зло. И еще́ себе́ творя́ еди́наго му́дра и пра́ведна. И всех люде́й честне́(й)ша себе́. О го́ре душегу́бцу. И еще́ порабо́тивши челове́ка не по пра́вде и кля́ться Бо́гом лжи́во и рабы́ своя́ дръжи́т (в) воздыха́нии и пла́че. И де́лом их унасиля́ет не по си́ле и гла́дом мори́т и нагото́ю. Го́ре челове́ку леня́щися итти́ воскресе́ние в це́рковь на поклоне́ние. И седя́ и глумны́я словеса́ глаго́люще и смею́щися, то есть от бе́са, и той челове́к хра́мина сатанина́. О го́ре челове́ком клену́щи святи́теля и чернца́, или́ черни́цу или́ ни́ща, то бо клене́ть це́рковь Бо́жию. О го́ре попу́ ра́но яду́щи и пию́щи. И осужа́еть дру́га своего́, о кото́рой вине́, а свои́ми грехи́ не пече́ться и затворя́ет врата́ своя́ от ни́щих. Стра́нных и убо́гих не здря́ще и стра́ха Бо́жия во се́рдце свое́м не име́ющи. И еще́ не пече́ться детьми́ свои́ми духо́вными о согреше́ниих. Лют отве́т прия́ти на стра́шном Суди́ще. О го́ре нам бра́тия упива́ющимся и ра́но яду́щим. Вся́кому христия́нину, я́ко недосто́ин есть Бо́гу и челове́ком еди́ному дия́волу любо́вен. О го́ре вся́кому челове́ку и́же в животе́ свое́м о душе́ свое́й не пече́ться. О бра́тия, воздохне́м из глубины́ се́рдца, и пла́чемся о поги́бели свое́й и о сла́босте, ох нам убо́гим. Ка́ко о чем пе́рвие воспла́чем. Скве́рными усты́ свои́ми. О лю́те мне гре́шному и убо́гому, что ожида́еши, окая́нная душе́, вся́кия скве́рны испо́лнена еси́. Ка́ко отрече́шися Судии́. Где ли скры́еши де́ла своя́ безако́нная. О лю́те мне гре́шному и убо́гому, ка́ко смире́ния не име́я всегда́ де́рзость, а покая́ния несть во мне. Всегда́ велича́ния держу́ся, поще́ния и покло́нив не име́ю ни моли́твы честы́й. И еще́ не име́ю ни ве́ры и не пра́вды ни любви́. Ка́ко хо́щеши поми́лована бы́ти. А всего́ зла испо́лнена еси́. Увы́ мне что сотворю́ не ве́дая. Постя́щися к Бо́гу. Челове́ки ви́дящи поклоня́ющися и ми́лостыню даю́щи. И в кро́тости живу́щи. Во всем во стра́се Бо́жии ходя́ща. И аз того́ всего́ не ви́дех во свое́й сла́босте. И ви́жу воздержа́ний живу́щих. И аз не поревнова́х житию́ их. И воздраща́юся аз окая́нный на злы́я де́ла. И рабы́ Бо́жия укори́х, язы́ком лука́вым и злым се́рдцем. О ка́ко хощу́ спасе́н бы́ти. Ви́дя челове́ки сла́быя и аз их се́рдцем полюби́х и предста́ к ним на зло и на па́губу душе́ свое́й. Ох мне убо́гому. Те́лу своему́ кал? нему́ уго́дие творю́. Злы́ми свои́ми де́лы. Неве́рьем и сла́бостью ду́шу свою́ сам потопля́ю в му́це ве́чней. Ох мне душе́ моя́. Ка́ко аз полиши́хся Бо́жии че́сти свои́м самово́льством. Таковы́я сла́вы. Какову́ све́тлость погуби́ти хо́щеши безстра́стием свои́м. Чему́ ду́ша окая́нная не послу́шаеши поуче́ния Госпо́дня. Святы́х и преподо́бных оте́ць. Почто́ всегда́ уклоня́ешися на зло о душа́ окая́нная. Слы́шала ли еси́ го́ркый отве́т и содрогни́ся зело́. Того́ бо отве́та вотрепе́щеши. О душа́ окая́нная, скве́рнами и нечисто́тами оскверня́ешися по вся часы́. Что не пла́чешися челове́че. Помы́сли житие́ се све́та сего тле́ннаго. День живе́м и весели́мся а во у́тре у́мрем. И в зе́млю по́йдем, и во прах бу́дем. О убо́гы челове́че сла́бостию свое́ю лсти́ши окая́нную свою́ ду́шу. Слы́шати и́маеши глас Го́спода Бо́га ка́ко призыва́ет пра́ведники и кро́ткия ми́лостивыя, блаже́ни ни́щии ду́хом, и пла́чуся Мене́ ра́ди, блаже́ни а́лчущи, блаже́ни ми́лостиви, блаже́ни чи́сти се́рдцем. Блаже́нни егда́ реку́т всяк зол глаго́л на вы, прииди́те и приими́те Мене́ ра́ди. Ра́дуйтеся и весели́те, прииди́те благослове́ннии Мене́ ра́ди я́ко пострада́сте и прии́мете. Cлы́шасте у́бо бра́тия моя́ драга́я. Что па́ки прие́млють сла́внии пра́ведници. Кро́тции послушли́вии Христо́вых за́поведей и прии́муть жизнь ве́чную. А лени́вии прии́мут за ле́ность свою́ му́ку ве́чную да се ве́дуще бра́тия и не дади́м бе́су ра́дости сла́бостью свое́ю. И подви́гнемся на до́брыя де́ла своего́ ра́ди спасе́ния, и сла́вим Святу́ю Тро́ицу.