Госпо́дь просла́вил отца́ о ча́дех, и суд ма́терень утверди́л на сы́нех. Чтый отца́ очи́стит грехи́ своя́, та́кожде обогати́тся прославля́ющий ма́терь свою́. Чтый отца́ возвесели́тся о ча́дех свои́х, и в день мольбы́ своея́ послу́шан бу́дет; и па́ки, прославля́яй отца́, до́лги дни сотвори́т, и послу́шаяй Го́спода поко́ит ма́терь свою́. Си́це у́бо и при́точествуяй глаго́лет, чти отца́ своего́, да на́йдет на тя благослове́ние от него́. Благослове́ние бо о́тчее утвержда́ет до́мы ча́дом, кля́тва же ма́терня искореня́ет до основа́ния. И не сла́вися в безче́стии отца́ своего́, и поноше́ние ча́дом ма́ти в безсла́вии.

Ча́до, заступи́ в ста́рости отца́ твоего́, и не оскорби́ его́ в животе́ его́, а́ще и избезу́мится в чем, не зазри́ ему́, и не укори́ его́ все́ю кре́постию свое́ю. Моли́тва бо о́тча незабве́на быва́ет, и в грех ме́сто привзы́щет ти ся, и в день ско́рби помяне́т ти ся. Я́коже на ю́ге мраз, та́ко у́бо греси́ твои́ раста́ются. В хуле́ не оставля́й отца́. Прокля́т бо Го́сподем раздража́яй отца́ и ма́терь свою́.

Ча́до, ле́та своя́ с кро́тостию провожда́й, да челове́ком прия́тен и возлю́блен бу́деши. Елма́ у́бо вели́к еси́, толма́ смири́ся пред Бо́гом, да обря́щеши благода́ть. Лу́чша себе́ не ищи́, и кре́пльша себе́ не пыта́й. Я́же ти суть повеле́на, та разумева́й, несть бо ти потре́ба. Та́йных во избы́тцех дел свои́х не распыта́й, вя́щший бо разу́м челове́ческаго пока́зан ти есть. Мно́ги у́бо прельсти́ло высокоу́мие, и мне́ние лука́во погуби́ло сове́ты их. Се́рдце же́стоко, озло́бится напосле́док. Любя́й беду́, пребыва́ет в ней. Се́рдце же́стоко отягчи́тся боле́знию гре́шник, и приложи́т грехи́ на грехи́. Му́дрости ве́дение и ра́зума, зако́н от Бо́га дан бысть нам. И творя́й дела́ до́брая, прия́тен Бо́гу. Велича́яй же ся свое́ю зло́бою, с не́ю же и состаре́ется. Наводне́нию лука́ваго и велича́ваго несть исцеле́ния, сад бо лука́вства укорени́лся в нем.

Се́рдце разу́мнаго, разуме́ет при́тчу, и у́хо послушли́ваго словеса́ прему́драго. Огнь паля́щь угаси́т вода́, а ми́лостыня очи́стит грехи́. Воздая́й благода́ти по́мнимь есть при́сно, и во вре́мя ско́рби обря́щет утвержде́ние. Ча́до, ни́щаго хле́ба не лиши́, и не мини́ о́чию прося́щаго. Души́ а́лчущи не оскорби́, и не разгне́вай му́жа в нищете́ его́. Ни се́рдца разгне́вана не превозмути́, и не ми́мо неси́ дая́ния тре́бующаго. Раба́ скорбя́ща не отре́й, и не отврати́ лица́ своего́ от ни́щаго. От тре́бующаго не отврати́ о́чию свое́ю, и не дай же ме́ста челове́ку кля́ти тя. Клену́щу бо тя в го́рести души́ своея́, мольбу́ его́ услы́шит Сотвори́вый его́, и прия́теля собо́рищу Своему́ сотворя́ет. Старе́йшему поклоня́й главу́ свою́. Приклони́ у́хо свое́ ни́щему, и отвеща́й ему́ ми́рно. Изми́ оби́дима из руки́ оби́дящаго, и не изнемога́й егда́ су́диши, бу́ди си́рым помо́щник, и вдови́цам я́ко оте́ц. И та́ко бу́деши сын Вы́шняго. Ему́же сла́ва, ны́не и при́сно и во ве́ки веко́в. [Ами́нь.]