Стихи́:

Косте́ми я́вльшимся безме́здником и му́чеником:

Точа́ще то́ки и чудеса́ безсре́брено:

В два́десят осмы́й яви́шася Кир и Иоа́нн.

Сия́ свята́я му́ченика и чудотво́рца, врача́ бе́ста при Диоклитиа́не царе́. Святы́й у́бо Кир бя́ше от Александри́и, Иоа́нн же от Еде́са. И совокупи́стася единонра́вия ра́ди. Обте́кше же и проше́дше врачева́ста всяк неду́г и вся́ку боле́знь. И мно́ги научи́ста ко спасе́нию. И явле́на бы́вша ме́ста того́ кня́зю, ею́же и предста́вив, и мно́ги на ня му́ки положи́в. Пото́м главы́ и́ма отсече́. Честны́я же ею́ мо́щи, ве́рными тогда́ сокрове́ны, обдержа́щаго ра́ди злоче́стия. Пото́м же в ца́рство Арка́диево, патриа́ршествующу во Александри́и Фео́филу, обрето́шася мо́щи ею́, и положе́ни бы́ша в це́ркви. И́хже торжество́ пра́зднуем днесь. Соверша́етжеся собо́р ею́ в Фораки́и во Арка́дианех.

Стихи́:

Маке́дония му́ченика пе́рсты

Отсеко́ша мужеуби́йц пе́рсты.

Стихи́:

Сни́ди ра́достну, Улькиа́не всеблаже́нный,

Небе́сная врата́ Христо́с тебе́ отве́рзет.

Стихи́:

Утоля́еши Па́вле пре́жде отше́ствия неду́ги,

Ны́не утоля́еши моли́твами вся стра́сти.

Па́вел преподо́бный оте́ц наш, бе у́бо от гра́да Кори́нфа, от христиа́ну роди́ся роди́телю. Измла́да Бога возлюби́в. И вшед во еди́н от монастыре́й, и бысть мних, и мно́го потружа́вся и́миже бысть иску́се. И боря́шеся с ним бес блу́дный. Во еди́ну же нощь моли́тву ему́ де́ющу, став пред ним бес я́ве, и рече ему́: «А́ще не сотвори́ши еди́ныя по́хоти, хощу́ на тя вооружи́тися». Он же запрети́в ему́ Христо́вым и́менем и изгна́ и́. Посе́м вни́де бес в не́кую жену́, и та прине́сши младе́нца, пове́рже его́ на ло́не Па́влу глаго́лющи: «Я́ко от тебе́ взях его́, и зача́х и роди́х». Он же прия́ младе́нца с ра́достию. Прише́дше же еретики́ связа́ша его́ нао́пако рука́ма, и навяза́вше младе́нца на вы́ю его́, и водя́ху его́ по гра́ду. Став же Па́вел посреде́ наро́да, и помаа́в руко́ю рече́: «Слышите бра́тие, да вопроси́м младе́нца ко́е его́ оте́ц». Бе же младе́нцу от рожде́ния тре́тий день. И глаго́ла младе́нцу: «Рцы, ко́е есть оте́ц твой?». Младе́нец же растерза́в пелены́, показа́в руко́ю свое́ю на не́коего ко́вача, и рече́: «Сей есть оте́ц мой, а не Па́вел мних». И па́дше вси поклони́шася ему́. И отто́ле даде́ ему Бог враче́бныя да́ры, и восклада́ше ру́це на неду́жныя, и здра́ви быва́ху. И пожи́в лет се́дмьдесять, в ста́рости до́бре ко Го́споду отъи́де.

Стихи́:

На дсках вре́менных и о́трока о́ба,

Распя́тии пишу́ о́троцы живопи́сец.

Стихи́:

На доброде́тельну взы́де го́ру Моисе́й,

И та́мо у́мре я́коже Моисе́й на горе́.

Стихи́:

Стерпи́т огне́м Дона́гносе своея́ главы́,

Я́коже Христо́с, рече́ весьма́ вла́су не косну́тися.

Стихи́:

Имя́ше Спа́се учени́к се́дмьдесять,

И́маши толи́ко страда́лец мече́м.

Стихи́:

Трие́ му́жие, но бо́льши словесы́

Се я́ко еди́н вмеща́емся к мечу́ трие́.

Стихи́:

На моли́тве боже́ственный и́здше Ма́гнос,

Бысть объявле́н, тишину́ житию́ испроси́в.

Бу́дите бра́тие ревни́тели до́брым дело́м, да до конца́ поживете́ ми́рно о Го́споде. Не укори́ стра́нна и прише́льца, но приими́ я́ в дом твой. Помяни́ Го́спода Иису́са Христа́ тебе́ ра́ди стра́нна бы́вша, не стыди́ся омы́ти но́зе его́, еда́ бо бу́дет а́нгел искуша́яй тя, и отщети́шися мзды пра́ведных. Слы́ши что сотвори́ Авраа́м? Седя́щу ему́ у ду́ба Мамври́йскаго под се́нию в полу́дни, воззре́в же и ви́де три му́жи ми́мо его́ гряду́ща. И воста́в тече́ на сре́тение их, и поклони́ся им до земли, глаго́ля: «Го́споди, а́ще обрето́х благода́ть пред Тобо́ю, не ми́мо иди́ раба́ Твоего́: Да принесе́тся вода́, и умы́ются ноги ва́ша: И возму́ хлеб, и яди́те, и по сих иди́те путе́м свои́м». Что же бысть ему́ страннолю́бие? Пе́рвое, друг Бо́жий нарече́ся. Посе́м сл́ыша во вре́мя, се роди́т тебе́ Са́рра сы́на, и мно́гим оте́ц бу́деши. Та́коже и Лот два стра́нника умоли́ у себе́ вита́ти, и та изведо́ста его́ из Содо́ма, да не сгори́т со беззако́нники. Та́коже, и Тови́я слеп сый, и той прия́т а́нгела, и́же сотвори́ его́ прозре́ти. К сему́ же и Госпо́дь учи́т ны глаголя: «Прие́мляй проро́ка во и́мя проро́че, мзду проро́чу приимет: И прие́мляй пра́ведника во и́мя пра́ведниче, мзду пра́ведничу прии́мет». Те́мже бра́тие, стра́нники люби́те, и своея́ трапе́зы о́бщники их твори́те, да и вы услы́шите Христа́ глаго́люща: «Поне́же сотвори́сте еди́ному от сих ме́ньших бра́тии Мое́й, Мне сотвори́сте: И Аз вам пода́м жизнь ве́чную».

Госпо́дь просла́вил отца́ о ча́дех, и суд ма́терень утверди́л на сы́нех. Чтый отца́ очи́стит грехи́ своя́, та́кожде обогати́тся прославля́ющий ма́терь свою́. Чтый отца́ возвесели́тся о ча́дех свои́х, и в день мольбы́ своея́ послу́шан бу́дет; и па́ки, прославля́яй отца́, до́лги дни сотвори́т, и послу́шаяй Го́спода поко́ит ма́терь свою́. Си́це у́бо и при́точествуяй глаго́лет, чти отца́ своего́, да на́йдет на тя благослове́ние от него́. Благослове́ние бо о́тчее утвержда́ет до́мы ча́дом, кля́тва же ма́терня искореня́ет до основа́ния. И не сла́вися в безче́стии отца́ своего́, и поноше́ние ча́дом ма́ти в безсла́вии.

Ча́до, заступи́ в ста́рости отца́ твоего́, и не оскорби́ его́ в животе́ его́, а́ще и избезу́мится в чем, не зазри́ ему́, и не укори́ его́ все́ю кре́постию свое́ю. Моли́тва бо о́тча незабве́на быва́ет, и в грех ме́сто привзы́щет ти ся, и в день ско́рби помяне́т ти ся. Я́коже на ю́ге мраз, та́ко у́бо греси́ твои́ раста́ются. В хуле́ не оставля́й отца́. Прокля́т бо Го́сподем раздража́яй отца́ и ма́терь свою́.

Ча́до, ле́та своя́ с кро́тостию провожда́й, да челове́ком прия́тен и возлю́блен бу́деши. Елма́ у́бо вели́к еси́, толма́ смири́ся пред Бо́гом, да обря́щеши благода́ть. Лу́чша себе́ не ищи́, и кре́пльша себе́ не пыта́й. Я́же ти суть повеле́на, та разумева́й, несть бо ти потре́ба. Та́йных во избы́тцех дел свои́х не распыта́й, вя́щший бо разу́м челове́ческаго пока́зан ти есть. Мно́ги у́бо прельсти́ло высокоу́мие, и мне́ние лука́во погуби́ло сове́ты их. Се́рдце же́стоко, озло́бится напосле́док. Любя́й беду́, пребыва́ет в ней. Се́рдце же́стоко отягчи́тся боле́знию гре́шник, и приложи́т грехи́ на грехи́. Му́дрости ве́дение и ра́зума, зако́н от Бо́га дан бысть нам. И творя́й дела́ до́брая, прия́тен Бо́гу. Велича́яй же ся свое́ю зло́бою, с не́ю же и состаре́ется. Наводне́нию лука́ваго и велича́ваго несть исцеле́ния, сад бо лука́вства укорени́лся в нем.

Се́рдце разу́мнаго, разуме́ет при́тчу, и у́хо послушли́ваго словеса́ прему́драго. Огнь паля́щь угаси́т вода́, а ми́лостыня очи́стит грехи́. Воздая́й благода́ти по́мнимь есть при́сно, и во вре́мя ско́рби обря́щет утвержде́ние. Ча́до, ни́щаго хле́ба не лиши́, и не мини́ о́чию прося́щаго. Души́ а́лчущи не оскорби́, и не разгне́вай му́жа в нищете́ его́. Ни се́рдца разгне́вана не превозмути́, и не ми́мо неси́ дая́ния тре́бующаго. Раба́ скорбя́ща не отре́й, и не отврати́ лица́ своего́ от ни́щаго. От тре́бующаго не отврати́ о́чию свое́ю, и не дай же ме́ста челове́ку кля́ти тя. Клену́щу бо тя в го́рести души́ своея́, мольбу́ его́ услы́шит Сотвори́вый его́, и прия́теля собо́рищу Своему́ сотворя́ет. Старе́йшему поклоня́й главу́ свою́. Приклони́ у́хо свое́ ни́щему, и отвеща́й ему́ ми́рно. Изми́ оби́дима из руки́ оби́дящаго, и не изнемога́й егда́ су́диши, бу́ди си́рым помо́щник, и вдови́цам я́ко оте́ц. И та́ко бу́деши сын Вы́шняго. Ему́же сла́ва, ны́не и при́сно и во ве́ки веко́в. [Ами́нь.]