Сисо́й блаже́нный измла́да Бо́га возлюби́в и крест Его́ на ра́мо взем, после́дова Ему́ и ополче́ния неви́димых враг победи́в. И ра́дуяся, отлучи́ся к по́стническим подвиго́м. Смиреному́дрен же вельми́ зело́ быв, и того́ ра́ди даде́ ему́ Госпо́дь благода́ть ме́ртвыя воскреша́ти, поне́же в пло́ти сый а́нгельски поживе́. Сотвори́ же мно́га зна́мения и мно́гими словесы́ к бра́тии бесе́дова, и по́льзова на успе́х и безконе́чный живо́т. Сего́ Госпо́дь позва́, и к невеще́ственей пре́йде жи́зни, иде́же святы́х весе́лия и присносу́щная све́тлость, и ны́не за ны гре́шныя мо́лится.