Стихи́:

Бо́гу уме́рый – на ти́тле напи́сан быв:

Боже́ственый Сисо́й – на духо́вней ти́тле – паде́:

В шесто́й вели́кий в вели́ких у́мер Сисо́й.

Сисо́й блаже́нный измла́да Бо́га возлюби́в и крест Его́ на ра́мо взем, после́дова Ему́ и ополче́ния неви́димых враг победи́в. И ра́дуяся, отлучи́ся к по́стническим подвиго́м. Смиреному́дрен же вельми́ зело́ быв, и того́ ра́ди даде́ ему́ Госпо́дь благода́ть ме́ртвыя воскреша́ти, поне́же в пло́ти сый а́нгельски поживе́. Сотвори́ же мно́га зна́мения и мно́гими словесы́ к бра́тии бесе́дова, и по́льзова на успе́х и безконе́чный живо́т. Сего́ Госпо́дь позва́, и к невеще́ственей пре́йде жи́зни, иде́же святы́х весе́лия и присносу́щная све́тлость, и ны́не за ны гре́шныя мо́лится.

Та свята́я му́ченица Луки́я бе убо в Сикели́и от Каппадоки́йския страны́. Я́та же бы́вши Ри́ксом вика́рием, и пону́ждена бысть пожре́ти и́долом, и не покори́вшися: восхоте́ Христо́ва раба́ бы́ти. И умили́вся вика́рий пусти́ ю́ и рабы́ни ея, и дом даде́ ей, и повеле́ ей моли́тву молча́щи де́яти. И не́когда иды́й на брань, моли́ и да помо́лится о нем к Бо́гу. И помо́льшися ей возврати́ся с побе́дою. По два́десяти же лет моли́ свята́я Луки́я вика́рия, ити́ хотя́щи в Кампанию му́читися по Христе́. Он же не восхоте́ ея́ еди́ныя пусти́ти, но оста́вив свою́ власть и бога́тство, жену́, и де́ти, и пое́мши ю́ и́де в Кампа́нию. И я́ти бы́ша от су́щаго ту иге́мона, и усе́кнуша главу́ ею́. Му́чени же бы́ша и ини́и с ни́ми: Анто́ний, и Лукиа́н, и Иси́дор, и Дио́н, Дио́р: и Куто́ний, Ароно́с, Капи́к, И Сату́р: и коне́ц муче́ния прия́ша.

Сей роди́ся во Фриги́и, научи́ себе́ благоче́стию. Прише́д же в Неоли́ду, ми́лостыню тре́бующым, и цельбу́ стра́ждущым лука́выми ду́хи подава́ше. Ру́фу же иге́мону того́ ну́дящу пожре́ти и́долом, и́же и бе́сом нечи́стым ят бысть, и уврачева́ его́ святы́й. Руф же да́ры у́бо и че́сти пода́в свято́му, отпусти́ его́. И иды́й путе́м к Перга́му, ят бысть киве́йскими е́ллины, и́же и нача́ша того́ мучити. Напрасно тру́су бы́вшу, падо́ша по земли́ це́ркви и и́долы, и связа́вше свята́го, оста́виша того без му́ки пребыва́ти. Клеа́р же не́кто прише́д ко гра́ду, и ем свята́го сокруши́ ему́ го́лени, но па́ки оздраве́в. И отто́ле де́сять лет пожи́в, и мно́гая чудеса́ сотвори́в, ко Го́споду отъи́де.

Стихи́:

Посе́чены Иса́вр со страда́лец пятери́цею,

Пла́менем мы́сленым, се́рдца сече́т среде́.

Святы́й Исавр и́же та́йнам Христо́вым диа́кон бе. И́же роди́шася во Афи́нех, во времена́ Нумериа́нова. Воста́вше же от оте́чества, доидо́ша во Аполониа́дский град. И та́мо открове́нием а́нгельским приидо́ша в не́который верте́п, и иде́же живя́ху Фили́к, и Перги́н, и Ерми́й, су́ще христиа́не, и́же благочести́выми словесы́ пита́еми, Иса́вром святы́м, и́же пи́щу им теле́сную принося́. Та́же пома́ле теше́ньми свята́го, стяжа́ния своя́ ни́щым разда́вше пребыва́ху с ним. Сро́дницы же их привести́ их хотя́ще во своя́, и отлучи́ти от свята́го наче́нше, и не возмого́ша. Оклевета́ша их Препонти́йскому епа́рху, и́же и ят их, и от Христа́ отста́вити не возмо́г, мече́м главы́ их повеле́ отсещи́. Иса́вр же диа́кон, и и́же с ним по́слани бы́ша от епа́рха ко Аполо́нию сы́ну его́, иде́же огне́м и водо́ю искуси́ми, и от сих же пресла́вно спасе́ни бы́вше. И мно́гия приведо́ша ко Христо́ве ве́ре. В них же Руф, и Руфи́н, боляре суще гра́да Аполони́йскаго коне́чное осужде́ние прие́мше. И на мно́зе помо́льшеся, прекло́ньше главы́, преда́ша ду́шы своя́ Го́сподеви.

Рече́ ста́рец: «Слы́шахом о не́коих святы́х Христа́ иму́щих в себе́, глаго́лющих о совокупле́нии четы́рех ста́рец, и́же поручи́шася друг с дру́гом, да единоду́шно и единому́дрено жи́вше в ве́це сем, Влады́чнему гла́су ве́ровавше глаго́лющему: «А́ще два от вас и́мене Моего́ ра́ди на земли́ совеща́ета о вся́кой ве́щи, е́же а́ще попро́сита, бу́дет и́ма от Отца́ Моего́ Небе́снаго». И трие́ у́бо в посте́ терпя́ще молча́льствоваху в пусты́ни. Други́й же служа́ше им потре́бная. Случи́ся у́бо двема́ сконча́тися о Христе́, и отъити́ от жития́, и отнесе́ным бы́ти во еди́но ме́сто поко́ищно. И оста́ти же двема́ на земли́, служа́щему у́бо и молча́льствующу. От наве́та же зла́го бе́са в блуд впаде́ служа́й. И открове́но бысть еди́ному прозорли́ву от святы́х, я́ко два преста́вльшаяся мо́лят о служи́тели Бо́га глаго́люще, я́ко преда́ждь бра́та сне́стися от льва или́ от ино́го зве́ря, да отмы́в грех прии́дет в ме́сто, иде́же и они́ бя́ху, и да не раздели́тся согла́сие их. И бысть внегда́ приити́ бра́ту по обы́чаю слу́жбы, и возврати́тися ему́ к молча́льнику, сре́те его́ лев, и хотя́ше его́ умори́ти. Уве́дев же молча́льник бы́вшее, откры́бося ему́, и ста на моли́тве моля́ Бо́га о бра́те, и внеза́пу ста лев. Два у́бо отца́ сконча́вшаяся моля́ста Бо́га глаго́люще: «Мо́лим Тя Влады́ко, оста́ви бра́та да прии́дет к нам в блаже́нство сие́, и не услы́ши моля́щагося отше́льника». Ста́рец же в ке́лии со вся́кою приле́жною моли́твою и со слеза́ми моля́ше Бо́га изба́вити бра́та и поми́ловати от льва. И услы́ша Бог моле́ние ста́рца, и рече́ ко отце́м на небеси́ су́щим: «Пра́ведно есть о́ного послу́шати па́че вас. Вы бо зде во отра́де есте́, преме́ньшеся трудо́в и пото́в жите́йских, то́йже изможда́л есть пло́тию трудо́м плотски́м, и в борьбе́ духово́м лука́вствия. Пра́ведно у́бо есть о́ному да́ти благода́ть па́че вас». И а́бие отъи́де лев от бра́та. И прише́д в ке́лию, обре́те ста́рца слезя́ща зань, и пове́да ему́ вся случи́вшаяся. И испове́да ему́ грех свой, е́же соде́я. И уве́де я́ко пощаде́ его́ Бог, пока́яся, и внутрь ма́ла вре́мене до́йде в пе́рвое пря́сло». Случи́ся у́бо обе́ма сконча́тися о Христе́. И открове́но бысть предрече́нному свято́му ста́рцу прозорли́вому, я́ко и четы́ре во еди́ном ме́сте суть, по нело́жных обетова́ниих Го́спода на́шего Иису́са Христа́. Ему́же сла́ва, ны́не и при́сно и во ве́ки веко́в. [Ами́нь.]