Во дни Диоклитиа́на царя, Дорофе́й не́кий христиани́н, со Евсе́виею жено́ю свое́ю, безча́дна же су́ща моля́стася Бо́гу пода́ти и́ма плод чре́ва, и того́ принести́ Ему́. Роди́ста же отроча́ же́нский пол в день неде́льный, и нареко́ста ей и́мя Кириаки́я, и́же и крести́ста ю́. Во уче́нии же и наказа́нии пита́юща, соблюдо́ста деви́цу ту́ю, Бо́гу возложи́ти мы́сляща. Гоне́нию же бы́вшу, пре́дани б́ы́ша Диоклитиа́ну царю́. И суди́в их и бив на мно́зе. И роди́теля ея посла́ Иу́сту ду́ксу, во страна́х Митили́нских. Кириаки́ю же Максимиану ке́сарю в Никомиди́ю, и ту́ю испыта́в, и в ве́ре обре́т ю́ тве́рду и непоколеби́му, пове́рг по земли́, и бив неми́лостивно на мно́ги часы́. Святе́й же моля́щися, неи́стовствоваше судия́. Рече́ же к нему́ свята́я: «Не прельща́йся Максимиа́не, никогда́ же мно́ю облада́ти и́маши, Бо́гу помога́ющу ми». Тогда́ посла́ ю́ Илариа́ну кня́зю Вифини́йскому. Он же ту́ю испыта́в, введе ю́ в ка́пище. И помо́льшися ей, бысть трус ве́лий, и падо́ша вси и́доли ка́пищнии и сокруши́шася, и бы́ша я́ко прах. И доше́дшу ви́хру ве́трену, и дви́гшу прах на возду́х. И блесну́вшися о́гненей мо́лнии, и попали́ лице́ Илариа́на кня́зя, и пад с престо́ла и́здше. Прише́д же ин князь, и быв ему сонасто́льник. И уве́дев о сих, осуди́ святу́ю огне́м сожже́ну бы́ти, и запа́льше сковраду́ ве́лию, и вверго́ша святу́ю посреде́. Она́ же ру́це к Бо́гу просте́рши, помо́льшися на мно́ги часы́. И ле́тному возду́ху чи́сту су́щу, сни́де о́блак с небесе́, и погаси́ всю си́лу о́гненную, ника́ко му́ченице вреди́ме бы́вши. Поста́вль же ю́ на суди́щи, напусти́ разли́чныя зве́ри на ню, и ничто́же успе́, валя́хуся бо зве́рие пред нога́ма ея́. Те́мже и мно́зи ве́роваша в Го́спода на́шего Иису́са Христа́. Свята́я же вве́ржена бысть в темни́цу. Пото́м же се́де князь на суди́щи, даде́ осужде́ние на ню. Она́ же испроси́ помоли́тися. И́же и помоли́ся на мно́ги часы́, и поучи́вши спосле́дствующыя ей христиа́ны. И прекло́ньшися к земли́, у́спе с ми́ром. И прише́дше во́ини, я́ко ви́деша ю́ уме́ршу, удиви́шася и бысть к ним глас: «Иди́те бра́тие, и пове́дайте вся вели́чия Бо́жия». Они́ же возврати́вшеся, сла́вляху Б́ога.