Калли́ник Христо́в му́ченик, бе от страны́ Килики́йския. Христиа́н же сый, и вся уча́ше сло́ву Бо́жию и удаля́тися от су́етных и́дол, Творца́ же Христа́ позна́ти вся́ческим. Тем ят бысть и приведе́н ко иге́мону, и от того́ во мно́ги му́ки вложе́н бысть. И в сапоги́ желе́зны с гвоздьми́ о́стрыми обуве́н и пону́жен бысть тещи́ пред ко́ньми до Акрага́нска гра́да, отстоя́щь верст о́смьдесять. Тече́ же святы́й, шестьдеся́ть верст, и ви́де веду́щия его́ во́ины жа́ждею исчеза́юща, и помоли́ся Бо́гу, и во́ду из земли́ изведе́, и напои́ всех. И прише́д во град Акрага́нский, и ту в пещь о́гнену вве́ржен бысть. И помоли́ся Бо́гови, и дух свой предаде́.