Стихи́:

Вве́ржен Калли́ник в пещь:

Соодоле́в лю́дем, обре́те боже́ственый вене́ц.

Калли́ник Христо́в му́ченик, бе от страны́ Килики́йския. Христиа́н же сый, и вся уча́ше сло́ву Бо́жию и удаля́тися от су́етных и́дол, Творца́ же Христа́ позна́ти вся́ческим. Тем ят бысть и приведе́н ко иге́мону, и от того́ во мно́ги му́ки вложе́н бысть. И в сапоги́ желе́зны с гвоздьми́ о́стрыми обуве́н и пону́жен бысть тещи́ пред ко́ньми до Акрага́нска гра́да, отстоя́щь верст о́смьдесять. Тече́ же святы́й, шестьдеся́ть верст, и ви́де веду́щия его́ во́ины жа́ждею исчеза́юща, и помоли́ся Бо́гу, и во́ду из земли́ изведе́, и напои́ всех. И прише́д во град Акрага́нский, и ту в пещь о́гнену вве́ржен бысть. И помоли́ся Бо́гови, и дух свой предаде́.

Феодо́тия Христо́ва му́ченица бе от Никомиди́йскаго гра́да, благочести́ва и боя́щися Бо́га, и за́поведем Его́ прилежа́ше, и ча́да своя́ со благоразу́мием воспитова́ше. Бе же в ле́та в ня́же Анастаси́я му́ченица страда́. И я́та бысть и та Левкаи́том кня́зем, и́же хоте́ ю́ на совокупле́ние бра́ка привести́. И не утоли́в ея́, предаде́ ю́ Никитиа́ну кня́зю Вифини́йскому: От него́же ку́пно с треми́ ча́ды свои́ми в пещь о́гненую вве́ржена бысть, и Бо́гу дух свой предаде́.

Бра́тие, во всем повину́йтеся князе́м, да без беды́ про́чая ле́та поживете́. Пи́сано бо есть: Кня́зю не рцы зла, да зло тебе́ не пости́гнет. Нече́стие бо есть, и́же кня́зю беззако́ннует, и пови́нен есть суду́. Не устыди́ши ли ся лица́ кня́жа, не бу́дет добра́ в се́рдцы твое́м. На кня́зя не помы́сли, и в ло́жницы твое́й не клени́ его́, еда́ пти́ца донесе́т глас твой до него́, и гото́в бу́деши пострада́ти зла́я. Сло́во кня́жо храни́, и от лица́ его́ не скры́йся ни отвраща́йся, я́ко все е́же хо́щет твори́т. Вла́стелем поклоня́й главу́ твою́, и зва́ния их не бу́ди преслу́шатися. И прише́д к нему́ не твори́ся ему́ ра́вен. Проти́ву судии́ не отвеща́й, а́ще и проны́рливи суть, но от Бо́га дана́ им держа́ва. Те́мже боя́тися подоба́ет не зло́бы их де́ля, но Бо́жия ра́ди повеле́ния.