Во гра́де у́бо не́коем бе́ста два чернори́зца, и идо́ста на слу́жбу, и я́ко минова́ше еди́н ею́ ме́сто, и возва́ еди́наго блудни́ца не́кая глаго́лющи: «Спаси́ мя о́тче я́ко Христо́с блудни́цу», он же челове́ческаго студа́ небре́г отню́д, глаго́ла ей: «Гряди́ в след мене́». И ем за ру́ку ея́, и изы́де сквозе́ наро́д из гра́да всем ви́дящим. Бысть же прослы́тие, я́ко чернори́зец поя́т жену́ Порфи́рию, та́ко бо зва́ху ю́. Иду́щима же и́ма, да ю́ впусти́т в монасты́рь, и обре́те жена́ у еди́ныя це́ркве отроча́ пове́ржено, и взят его́ да вско́рмит. По ле́те же еди́ном приидо́ша в зе́млю е́тери, иде́же бе блудни́́ца, и ви́девше ю́ иму́щу де́тище, и глаго́лаша ей: «До́бре черни́це черни́чищь родила́ еси́». Ше́дше же в Тир ви́девшии ю́, отту́ду бо поя́л ю́ бя́ше черне́ц, и пове́даша та́мо я́ко родила́ есть жена́ Порфи́рия от ста́рца, и мы ви́дехом отроча́ очи́ма свои́ма подо́бно ему́. Егда́ же уве́да чернори́зец от Бо́га смерть свою́, и глаго́ла чернори́зице Пелаги́и, та́ко бо проименова́ ю́, егда́ даде́ ей о́браз святы́й: «По́йдема в Тир, я́ко ору́дие ми та́мо есть, хощу́ да и́деши со мно́ю». Она́ же не мо́же ся его́ отпре́ти, и́де во след его́. И приидо́ста иму́ща отроча́ седми́ лет су́що. И я́ко разболе́ся чернори́зец боле́знию сме́ртною, и взыдо́ша на посеще́ние его из гра́да сто челове́к. И глаго́ла: «Принесе́те огнь». И я́ко принесо́ша кади́льницу, и взем у́глие горя́щее ста́рец, и всы́па в стиха́рь свой, и рече́: «Изве́сто вы бу́ди бра́тие, зане́ я́коже Бог сохрани́в купину́ огне́м неопали́му, и я́коже и стихарю́ моему́ не прикосну́шася у́глия сия́, та́ко и аз не позна́х греха́ же́нска отне́леже рожде́н есмь». И вси диви́шася я́ко не сгоре́ стиха́рь его́ от огня́, и просла́виша Бо́га иму́щаго та́йныя рабы́. От вины́ же ма́тере Пелаги́и бы́вшия иногда́ блудни́цы мно́зи ше́дше по ней отре́кшеся ми́ра, и ше́дше в монасты́рь и постриго́шася. Сего́ ра́ди рече́но бысть вам, о́ ча́да, не бу́дите гото́ви на осужде́ние и охуле́ние чужди́х грехо́в. Мн́ожицею бо блудника́ согреша́юща ви́дехом, покая́ния же творя́ща не ви́дехом. Или́ кра́дуща не́коего ви́дехом, а воздыха́ния и слез я́же принесе́ Го́сподеви, не све́мы, я́ко от Бо́га прия́т бысть в та́йне покая́нии его́ и испове́дании. И вси дивля́хуся о уче́нии де́тельнаго пастуха́ и учи́теля.