Си́и святи́и бя́ху во времена́ Де́кия царя́, сы́нове старе́йшин гра́дских, вси бе́ша в Христо́ве ве́ре. Слы́шав же Де́кий о них, повеле́ их привести́ пред ся, и мно́го ну́див я́ жре́ти су́етным бого́м. И ви́дев их не поко́ршася, и́де во ин град сотвори́ти хоте́ние свое́, и па́ки возврати́вся да́ти на ня отве́т. Си́и же святи́и о́троцы прии́мше зла́то и сребро́ на пи́щу себе́, изыдо́ша в пеще́ру близ су́щу гра́да, глаго́лемую О́хли, и ту пребы́ша дни мно́ги моля́щеся Бо́гу. Амбли́х же бе мний, и той вхожда́ше во град купи́ти им бра́шна. Еди́ною же ему́ ше́дшу, слы́ша Де́кия возврати́вшася в Ефе́с, и шед в верте́п пове́да друго́м свои́м. И та́ко помоли́вшеся Бо́гу, усну́ша честны́м и непоро́чным сном. Де́кий же сотвори́ взыска́ние о них, и призва́в роди́теля их вопроша́ше о них. И пове́даша их в горе́ той, О́хли су́ща. Де́кий же мнев их жи́вы, посла́ и наложи́ ка́мень вели́к на у́стие пеще́ры тоя́. Се же бысть Человеколю́бца Бо́га про́мыслом. Посе́м Де́кий царь у́мре, и и́нех мно́го царе́й измени́ся до Феодо́сия царя́. И подви́жено бысть от ерети́к е́же глаго́лати им не бы́ти Воскресе́нию. И царе́ви о сих пеку́щуся. Хотя́й же Бог извести́ти всем я́ко есть Воскресе́ние ме́ртвым, изво́ли отве́рсти пеще́ру и воскреси́ти сих из ме́ртвых. И воста́ша си́и святи́и при Феодо́сии царе́, спа́вше три́ста лет и се́дмьдесять два. И седо́ша вси вку́пе, мня́щеся с ве́чера ле́гше. И посла́ша Амбли́ха во град потре́бы ра́ди, со зла́том и сребро́м. Иду́щу же ему́ ко гра́ду, ви́де о́браз честна́го Креста́ пригвожде́н на врате́х, и дивля́шеся в себе́. Вшед же во град. Слы́ша клену́щася и́менем Госпо́дним, и мы́сляше в себе́ глаго́ля, еда́ не се есть Ефе́с. И изъе́м зла́то нача́ купи́ти хле́бы. Продаю́щии же донесо́ша анфипа́ту, я́ко бя́ше пре́жних царе́й сребро́, и Де́киево зна́мение бя́ше на ца́тах тех. Мно́го же испыта́емь, пове́да дружи́ну свою́ в пеще́ре. И и́де епи́скоп и анфипа́т к пеще́ре, и обрето́ша пре́жде на у́стии пеще́ры ковче́г оловя́н, и отве́рзше вы́няша две дщи́це оловя́не, напи́сано у́бо на нею́ муче́ние святы́х. И вше́дше в пеще́ру, обрето́ша святы́я седя́ща, и та́ко просла́виша Бо́га. Бысть же явле́ние сих в 4 день а́вгуста. Посла́ша же весть в Царь град, к царю́ Феодо́сию. С ра́достию же прии́де царь во Ефе́с, и вни́де в пеще́ру иде́же бя́ху святи́и, и покло́нься им до земли́, и облобыза́ вы́я их, прославля́я Человеколю́бца Бо́га. Мно́го же поучи́вше царя́ о ве́ре Бо́жией, и преда́ша душа́ своя́ в ру́це Бо́жии, ме́сяца октября́ в два́десять вторы́й день.