Стихи́:

Ефе́ское воспита́ние успо́ша кре́пко,

Доне́леже их Христо́с возбуди́, уверя́я бу́дущее Воскресе́ние:

Непло́ды су́щи пеще́ра породи́ седмь дете́й а́вгуста в четве́ртый.

Си́и святи́и бя́ху во времена́ Де́кия царя́, сы́нове старе́йшин гра́дских, вси бе́ша в Христо́ве ве́ре. Слы́шав же Де́кий о них, повеле́ их привести́ пред ся, и мно́го ну́див я́ жре́ти су́етным бого́м. И ви́дев их не поко́ршася, и́де во ин град сотвори́ти хоте́ние свое́, и па́ки возврати́вся да́ти на ня отве́т. Си́и же святи́и о́троцы прии́мше зла́то и сребро́ на пи́щу себе́, изыдо́ша в пеще́ру близ су́щу гра́да, глаго́лемую О́хли, и ту пребы́ша дни мно́ги моля́щеся Бо́гу. Амбли́х же бе мний, и той вхожда́ше во град купи́ти им бра́шна. Еди́ною же ему́ ше́дшу, слы́ша Де́кия возврати́вшася в Ефе́с, и шед в верте́п пове́да друго́м свои́м. И та́ко помоли́вшеся Бо́гу, усну́ша честны́м и непоро́чным сном. Де́кий же сотвори́ взыска́ние о них, и призва́в роди́теля их вопроша́ше о них. И пове́даша их в горе́ той, О́хли су́ща. Де́кий же мнев их жи́вы, посла́ и наложи́ ка́мень вели́к на у́стие пеще́ры тоя́. Се же бысть Человеколю́бца Бо́га про́мыслом. Посе́м Де́кий царь у́мре, и и́нех мно́го царе́й измени́ся до Феодо́сия царя́. И подви́жено бысть от ерети́к е́же глаго́лати им не бы́ти Воскресе́нию. И царе́ви о сих пеку́щуся. Хотя́й же Бог извести́ти всем я́ко есть Воскресе́ние ме́ртвым, изво́ли отве́рсти пеще́ру и воскреси́ти сих из ме́ртвых. И воста́ша си́и святи́и при Феодо́сии царе́, спа́вше три́ста лет и се́дмьдесять два. И седо́ша вси вку́пе, мня́щеся с ве́чера ле́гше. И посла́ша Амбли́ха во град потре́бы ра́ди, со зла́том и сребро́м. Иду́щу же ему́ ко гра́ду, ви́де о́браз честна́го Креста́ пригвожде́н на врате́х, и дивля́шеся в себе́. Вшед же во град. Слы́ша клену́щася и́менем Госпо́дним, и мы́сляше в себе́ глаго́ля, еда́ не се есть Ефе́с. И изъе́м зла́то нача́ купи́ти хле́бы. Продаю́щии же донесо́ша анфипа́ту, я́ко бя́ше пре́жних царе́й сребро́, и Де́киево зна́мение бя́ше на ца́тах тех. Мно́го же испыта́емь, пове́да дружи́ну свою́ в пеще́ре. И и́де епи́скоп и анфипа́т к пеще́ре, и обрето́ша пре́жде на у́стии пеще́ры ковче́г оловя́н, и отве́рзше вы́няша две дщи́це оловя́не, напи́сано у́бо на нею́ муче́ние святы́х. И вше́дше в пеще́ру, обрето́ша святы́я седя́ща, и та́ко просла́виша Бо́га. Бысть же явле́ние сих в 4 день а́вгуста. Посла́ша же весть в Царь град, к царю́ Феодо́сию. С ра́достию же прии́де царь во Ефе́с, и вни́де в пеще́ру иде́же бя́ху святи́и, и покло́нься им до земли́, и облобыза́ вы́я их, прославля́я Человеколю́бца Бо́га. Мно́го же поучи́вше царя́ о ве́ре Бо́жией, и преда́ша душа́ своя́ в ру́це Бо́жии, ме́сяца октября́ в два́десять вторы́й день.

Стихи́:

Елевфе́рие не устраш́ися меча́,

Свобо́ден име́я ум от вся́каго стра́ха.

Елевфе́рий святы́й му́ченик бе от гра́да Византи́и, ед́ин от сигкли́тик сове́тник, и сказа́тель церко́вных глагол. Творе́нием же бе скопе́ц, и люби́мь и че́стен все́ми, и тому́ самому́ царе́ви Максимиа́ну усво́ен. И зане́же бе уго́ден Бо́гу, и соверши́тель боже́ственых за́поведей Его́, не прича́стен же боже́ственнаго и свята́го креще́ния, и премы́сли царя́ му́дрости, испроси́ся на созда́ние се́ла твори́ти. Глумле́ния ра́ди честн́аго возду́х. И а́бие получи́в проше́ние, и шед поста́ви дом при Сага́ре реце́, и созда́ внутрь дом ни́зок, храм до́му Бо́жия: И украси́в я́коже подоба́ше, и освяти́ олта́рь рука́ма честны́х иере́й. И сам освяти́ себе́ божественным креще́нием, и ми́ром пома́зан быв, и святых Та́ин прича́стник бысть, и ктому́ отто́ле не исходя́ бе. И призва́н бысть царе́м, и нача́т вопроша́емь бы́ти. Он же глаго́лаше пред царе́м: неду́г доше́дшь до себе́. И разуме́ царя́ Максимиа́н, я́ко уже́ крести́лся есть Елевфе́рий, и мно́го му́чив его́, осуди́в мече́м усе́кнути. И та́ко за Христа́ пострада.

Сей у́бо вели́кий оте́ц наш Сисо́й пусты́нник, от ю́ности прии́м мона́шеский о́браз. И всели́ся в пусты́ню Нитри́йскую, и мно́ги труды́ показа́ к Бо́гу. И егда́ хоте́ преста́витися седящым у него́ бра́тии, и просвети́ся лице́ его́ я́ко со́лнце. И глаго́ла: «Се оте́ц Аффо́ний прии́де». И ма́ло помолча́в па́ки рече́ им: «Се лик проро́ческий прии́де». И больми́ просвети́ся, и рече́: «Се лик апо́стольский прии́де». И сугу́бо просвети́ся лице́ его па́ки. И се той я́ко со ине́ми бесе́доваше. И моли́ша и ста́рцы глаго́люще: «Рцы нам, с ким бесе́дуеши о́тче?». Он же рече́: «Се а́нгели приидо́ша поя́ти мене́, молю́ся, да оста́вят мене́ ма́ло, хощу́ бо пока́ятися». И реко́ша ему́ ста́рцы: «Не тре́буеши покая́ния о́тче». Рече́ же им ста́рец: «Вои́стину не ве́де я́ко есть ли ми нача́ток». Ви́деша же вси я́ко соверше́н есть. И па́ки внеза́пу бысть лице́ его́, я́ко со́лнце, и убоя́шася вси. И глас бысть: «Принеси́те ми сосу́д избра́нный пусты́нный». И а́бие предаде́ дух свой. И бысть мо́лния, и испо́лнися храм благоуха́ния.

Пове́даше еди́н от ста́рец, я́ко три суть ве́щи чернце́м че́стны. К ним же подоба́ет нам со стра́хом и тре́петом и ра́достию духо́вною приступа́ти: обще́ние Святы́х Та́ин, и трапе́за бра́тий, и умове́ние. Приноша́ше же и при́тчу глаго́ля, я́ко бе еди́н ста́рец прозорли́в в бра́тии, и ви́дяше ду́хом яду́щих седя́щих на трапе́зе, яковы́ суть: о́вых яду́ща мед, а о́вых хлеб, а ины́х моты́лу, и диви́ся ста́рец в себе́. И моля́шеся Бо́гу глаго́ля: «Го́споди яви́ ми та́йну сию́, я́ко у́бо еди́на бра́шна предложе́на суть всем на трапе́зе в снедь, но почто́ измене́ны суть, о́ви у́бо ядя́т мед, о́ви же хлеб, а ини́и моты́лу?» И прии́де ему́ глас свы́ше глаго́ля, я́ко яду́щии мед, сии суть со стра́хом и тре́петом и ра́достию духов́ною седя́т на трапе́зе, и непреста́нно мо́лятся, и моли́тва их а́ки кади́ло восхо́дит к Бо́гу, те́мже мед ядя́т. А яду́щии хлеб, си́и суть хва́лящии вкуше́ние да́ное им от Бо́га. А яду́щии мотылу, си́и суть ро́пщущии, и глаго́люще: «Се добро́, а се гни́ло». Того́ ра́ди не подоба́ет сих мы́слити, но па́че воспева́ти Бо́га и сл́авити пе́сньми Его́. Да в нас сконча́ется рече́нное: «А́ще я́сте а́ще пиете́, а́ще ли и́но что творите́, все во сла́ву Бо́жию твори́те».