Си́це ин ра́зум сопривхо́дит и о пти́це сей, от е́же бо бы́ти ей пти́це. Пти́чее житие́ назна́менует име́ти нам нестяжа́тельное и безпеча́льное. А е́же не име́ти ей крилу́, и пол ея́. О́во бо е́же не высо́ко мы́слити, но смире́ными соотводи́тися. Мно́жицею бо живу́щым нам в ми́ре и тишине́, мни́мся ско́ро и высо́ко летя́ще я́коже и оре́л в поднебе́сная. Егда́ же суть смире́не и оконча́не криле́ его́, тогда́ ни́зу пари́т. Си́це и на ны Бо́гу попусти́вшу ско́рби и напа́сти, ни́зко и смире́но быва́ет на́ше мудрова́ние. Ско́ро бо ходя́щии, претыка́ют о ка́мень но́гу свою́. О́во же е́же не двоемы́слену бы́ти, но еди́ну мысль име́ти горе́ к Бо́гу, а не я́ко змия́ по́лзати по земли́. Единомы́сленыя бо вво́дит в дом Госпо́дь, и да не приступи́ши к нему́ во двою́ путю́. Криле́ же еста́ дея́ние и виде́ние, и́миже восхо́дим к Бо́гу. О нею́ же и Дави́д моля́шеся; или́ чистота́ и ми́лостыня, я́же бу́яя де́вы еди́но крило́ име́ша, сего́ ра́ди отпадо́ша; или́ пост и моли́тва, мо́жета бо и от сме́рти изба́вити челове́ка; или́ послуша́ние и пра́вость се́рдца, я́же врага́ еста́ и ра́тника презо́рству. И сим подо́бная.

Дре́во же крест образу́ет, е́же есть умерщве́ние ми́ра, и всех ско́рбных терпе́ние, е́же соде́ловают Христо́вы ученицы́ во отверже́нии свои́х воль. Мир у́бо стра́сти суть. Тогда́ бо возмо́жем воспе́ти песнь сла́дку Го́сподеви. Ка́ко бо возмо́жем пе́ти на земли́ чужде́й, е́же есть стра́стней. Мно́гажды бо таковы́я ве́щи от нас мни́мы ничто́же поле́зно иму́ща. Мно́га же смиреному́дрия и умиле́ние вино́вна прие́млющым та быва́ют, с ра́зумом пра́вым и благи́м произволе́нием. О́ко бо пра́во не зрит лука́вая. Сопроти́вное же проявле́нно. Я́коже и бы́лия не́кая неразсу́дне прие́млющым, смертоно́сна обрета́ются. А и́же уме́ренне и благовре́менне, цельбе́ хода́тайствена. Си́це и ору́жия на враги́ прие́млющии, неразуме́ющым та до́бре упра́вити, в сердца́ своя́ водружа́ют. Я́коже о сих вели́кий учи́тель простра́нне изложи́. Несть бо на́ша брань к кр́ови и пло́ти.

Помо́лим же ся Го́сподеви я́ко да да́рует нам умиле́ние, да слеза́ми отмы́вше грехи́ на́ша, чи́сти обря́щемся на Стра́шнем Суди́щи о́ном, и сподо́бимся услы́шати блаже́нный глас, зову́щь благослове́ныя в Ца́рствие. Его́же бу́ди всем нам получи́ти, благода́тию и человеколю́бием Господа на́шего Иису́са Христа́. С Ни́мже Отцу слава ку́пно со Святы́м Ду́хом ны́не и при́сно и во ве́ки веко́в. Ами́нь.