Си́и ученицы́ бы́вше свята́го апо́стола Петра́, еще́ Христу́ ходя́щу теле́сно по земли́, и чудоде́йствующу. Марке́лл же слы́шав, прии́де от Антиохи́и в Иерусали́м с Пагкра́тием ви́дети его́, и от тогда́ у́бо Пагкра́тий позна́ся со святы́м Петро́м. И по воскресе́нии Христо́ве после́дствоваше ему́, и поста́влен бысть от него епи́скоп Тавромени́йский, и бя́ше служа́ о и́мени Христове, и убие́н бысть тай от е́ллин. Та́коже и Марке́лл поста́влен бысть Сикели́йский епи́скоп, и мно́жество неве́рных обрати́ ко Го́споду, и сконча́ся. Та́коже и Филагри́й в Ки́пре архиере́йствова, уча́ и той о и́мени Христо́ве. И мно́ги напа́сти претерпе́в о и́стинней ве́ре, ко Го́споду отъи́де.